જમ્મુ/શ્રીનગર: કાશ્મીર ખીણમાં શિયાળાનો સૌથી આકરો અને કઠોર ગણાતો સમયગાળો આજ રાતથી (રવિવાર રાતથી) શરૂ થઈ રહ્યો છે. ૪૦ દિવસ સુધી ચાલનારા આ ભયંકર ઠંડીના સમયગાળાને સ્થાનિક ભાષામાં 'ચિલ્લઈ કલાં' (Chillai Kalan) કહેવામાં આવે છે. આ ફારસી શબ્દ છે જેનો અર્થ થાય છે 'પ્રચંડ ઠંડી'. હવામાન વિભાગના જણાવ્યા અનુસાર, અત્યારે સુકી ઠંડી છે પરંતુ ૨૨ ડિસેમ્બરથી ખીણમાં હિમવર્ષા થવાની પ્રબળ શક્યતાઓ છે.

*શું છે ‘ચિલ્લઈ કલાં’ અને શિયાળાના ત્રણ તબક્કા?*

કાશ્મીરમાં શિયાળો ત્રણ તબક્કામાં વહેંચાયેલો હોય છે, જે કુલ ૭૦ દિવસ ચાલે છે:

૧. ચિલ્લઈ કલાં (૪૦ દિવસ): આ સૌથી કઠોર તબક્કો છે જે ૨૧ ડિસેમ્બરથી શરૂ થઈને ૩૧ જાન્યુઆરી સુધી ચાલે છે. આ દરમિયાન તાપમાન માઈનસમાં જ રહે છે અને ભારે હિમવર્ષા થાય છે.

૨. ચિલ્લઈ ખુર્દ (૨૦ દિવસ): ચિલ્લઈ કલાં પછી ૨૦ દિવસનો સમયગાળો આવે છે, જેમાં ઠંડીની તીવ્રતા થોડી ઘટે છે.

૩. ચિલ્લઈ બચ્ચા (૧૦ દિવસ): છેલ્લે ૧૦ દિવસનો સમયગાળો આવે છે, જેને 'નાની ઠંડી' કહેવાય છે. આ સાથે શિયાળો વિદાય લે છે.

*દાલ લેઇક થીજવાની શરૂઆત*

શ્રીનગરમાં તાપમાન ગગડીને શૂન્યથી નીચે એટલે કે માઈનસ ૬ ડિગ્રી સુધી પહોંચી ગયું છે. જેના કારણે વિશ્વપ્રખ્યાત દલ સરોવરના ઉપરના પાણીની પરત ઘણા વિસ્તારોમાં થીજી ગઈ છે. સ્થાનિક રહેવાસી અબ્દુલ રહીમના જણાવ્યા મુજબ, સરોવરના અંદરના ભાગો થીજી ગયા છે અને આગામી દિવસોમાં ઠંડી વધતા આખું સરોવર બરફની ચાદરમાં ફેરવાઈ જશે તેવી શક્યતા છે.