નવી દિલ્હી : ભારતની સૌથી મોટી ખાનગી એરલાઇન ઇન્ડિગોએ આ મહિનાની શરૂઆતમાં થયેલી ઓપરેશનલ નિષ્ફળતા બદલ મુસાફરોની માફી માંગવા માટે મોટું પગલું ભર્યું છે. 3, 4 અને 5 ડિસેમ્બરના રોજ ફ્લાઇટ રદ થવાને કારણે જે મુસાફરો એરપોર્ટ પર અટવાયા હતા અથવા જેમની યાત્રા ખોરવાઈ હતી, તેમને એરલાઇન આગામી 26 ડિસેમ્બરથી ₹10,000ના ટ્રાવેલ વાઉચર આપવાનું શરૂ કરશે. ખાસ વાત એ છે કે આ વાઉચર નાગરિક ઉડ્ડયન મંત્રાલયના નિયમ મુજબ મળતા ₹5,000 થી ₹10,000ના રોકડ વળતર ઉપરાંતના રહેશે. એરલાઇનનો આ નિર્ણય એવા સમયે આવ્યો છે જ્યારે સરકાર અને DGCA એ મુસાફરોને પડતી હાલાકી બદલ કડક વલણ અપનાવ્યું હતું.

નાગરિક ઉડ્ડયન મંત્રાલયે ઇન્ડિગોને સ્પષ્ટ આદેશ આપ્યો છે કે ટ્રાવેલ એજન્ટો કે ઓનલાઇન પોર્ટલ દ્વારા બુકિંગ કરાવનારા મુસાફરોને પણ વિલંબ વગર સીધું વળતર મળવું જોઈએ. ઘણીવાર એરલાઇન અને બુકિંગ સાઇટ્સ વચ્ચેના સંકલનના અભાવે રિફંડ અટકી જતું હોય છે, પરંતુ આ વખતે મંત્રાલય તેના 'એર સર્વિસીસ ફરિયાદ પોર્ટલ' દ્વારા પ્રત્યેક કેસ પર સીધી નજર રાખશે. અહેવાલ મુજબ, મેક માય ટ્રીપ જેવી મોટી એજન્સીઓએ તો ઇન્ડિગો પાસેથી પૈસા મળે તે પહેલાં જ પોતાના ગ્રાહકોને લગભગ ₹10 કરોડના રિફંડની પ્રક્રિયા પૂર્ણ કરી દીધી છે, જે મુસાફરો માટે મોટી રાહત સમાન છે.

આ ભીષણ ઓપરેશનલ સંકટ બાદ ઇન્ડિગોના ચેરમેન વિક્રમ સિંહ મહેતાએ સ્વીકાર્યું છે કે આવી નિષ્ફળતા ભવિષ્યમાં ન થાય તે માટે કંપની બાહ્ય ટેકનિકલ નિષ્ણાતોની મદદ લેશે. નિષ્ણાતોની આ ટીમ એરલાઇનના સોફ્ટવેર અને પ્લાનિંગમાં ક્યાં ક્ષતિ રહી ગઈ તેની તપાસ કરશે. જોકે, કંપનીએ દાવો કર્યો છે કે 9 ડિસેમ્બરથી તેમની તમામ કામગીરી રાબેતા મુજબ શરૂ થઈ ગઈ છે અને નેટવર્ક સંપૂર્ણપણે સ્થિર છે. હવે 26 ડિસેમ્બરથી શરૂ થનારી વાઉચર વિતરણ પ્રક્રિયા પ્રવાસીઓના આક્રોશને કેટલો શાંત કરી શકે છે તે જોવું રહ્યું.