લખનૌ: ઉત્તર પ્રદેશમાં પ્રતિબંધિત કોડીન કફ સિરપના ગેરકાયદે વેપારનો પર્દાફાશ થતા રાજકારણ ગરમાયું છે. ડેપ્યુટી સીએમ કેશવ પ્રસાદ મૌર્યએ કડક કાર્યવાહીની ખાતરી આપી છે, જ્યારે વિપક્ષી નેતા અખિલેશ યાદવે સરકાર પર તથ્યો છુપાવવાનો આરોપ લગાવ્યો છે.

ઉત્તર પ્રદેશના રાજકીય વર્તુળોમાં હાલમાં 'કોડીન કફ સિરપ કાંડ' ગાજી રહ્યો છે. ગેરકાયદેસર નશાના કારોબાર સાથે સંકળાયેલા આ પ્રકરણમાં સત્તાધારી પક્ષ અને વિપક્ષ આમને-સામને આવી ગયા છે.

ઉત્તર પ્રદેશના નાયબ મુખ્યમંત્રી કેશવ પ્રસાદ મૌર્યએ આકરા તેવર બતાવતા કહ્યું હતું કે, "આ કાંડમાં સંકળાયેલા કોઈપણ ગુનેગારને છોડવામાં આવશે નહીં. જે લોકો નશાના કારોબારથી યુવાધનને બરબાદ કરી રહ્યા છે, તેમને ઉંધા લટકાવી દેવામાં આવશે." તેમણે વિપક્ષી નેતા અખિલેશ યાદવ પર નિશાન સાધતા કહ્યું હતું કે અખિલેશ યાદવ ભલે ગમે તેટલા પ્રયાસ કરે, પરંતુ તેઓ ગુનેગારોને બચાવી શકશે નહીં.

બીજી તરફ, સમાજવાદી પાર્ટીના વડા અખિલેશ યાદવે પણ સરકાર પર વળતો પ્રહાર કર્યો છે. તેમણે કહ્યું હતું કે, "હું તેમની મજબૂરી સમજી શકું છું, પરંતુ કોડીન કફ સિરપ કાંડમાં એવી ઘણી મહત્વની બાબતો છે જે સરકાર જાણીજોઈને છુપાવી રહી છે." 

અખિલેશ યાદવે આક્ષેપ કર્યો છે કે સરકાર મોટા માથાઓને બચાવવાનો પ્રયાસ કરી રહી છે અને માત્ર નાના પ્યાદાઓને પકડીને સંતોષ માની રહી છે. આ પ્રકરણે હવે રાજ્યમાં કાયદો અને વ્યવસ્થાની સ્થિતિ પર પણ પ્રશ્નો ઉભા કર્યા છે. આગામી દિવસોમાં આ મુદ્દે વધુ રાજકીય આક્ષેપબાજી જોવા મળી શકે છે.