ભદોહી: ઉત્તર પ્રદેશના ભદોહી જિલ્લામાં આયોજિત 'વિરાટ હિંદુ સંમેલન'માં રાજ્ય મહિલા આયોગના ઉપાધ્યક્ષ અપર્ણા બિષ્ટ યાદવે હિંદુત્વ અને ભગવાન રામને લઈને અત્યંત આક્રમક નિવેદન આપ્યું છે. સપા સંરક્ષક મુલાયમ સિંહ યાદવના પુત્રવધૂ અને ભાજપ નેતા અપર્ણા યાદવે વિરોધ પક્ષો અને ટીકાકારો પર પ્રહાર કરતા કહ્યું કે, "જો આ દેશમાં ભગવાન રામના નામે યોજનાઓ નહીં ચાલે, તો શું અલ્લાહના નામે ચાલશે?" તેમના આ નિવેદનથી રાજકીય ગલિયારાઓમાં ગરમાવો આવી ગયો છે.
સંમેલનમાં મુખ્ય વક્તા તરીકે સંબોધન કરતા અપર્ણા યાદવે ભારપૂર્વક જણાવ્યું કે, ભગવાન રામ ભારતની સંસ્કૃતિ અને આસ્થાના પ્રતીક છે. જો સરકાર તેમના નામે લોકકલ્યાણની યોજનાઓ ચલાવે છે, તો તેની સામે વાંધો ઉઠાવવો એ દેશની ઓળખ પર હુમલો કરવા સમાન છે. તેમણે સ્પષ્ટ કર્યું કે રામ રાજ્યની કલ્પના એ જ સાચું સુશાસન છે અને તેનાથી કોઈને પરેશાની ન હોવી જોઈએ.
પોતાના ભાષણને વધુ આક્રમક બનાવતા અપર્ણા યાદવે હિંદુ સમાજની એકતા અને સુરક્ષા પર ભાર મૂક્યો હતો. તેમણે કહ્યું કે, "હિંદુ સમાજ હંમેશા શાંતિપ્રિય રહ્યો છે, પરંતુ જો સમાજ અને ધર્મની રક્ષાનો પ્રશ્ન આવશે, તો અમે શસ્ત્ર ઉઠાવતા પણ પાછળ નહીં હટીએ." તેમણે હિંદુઓને સંગઠિત થવા અને પોતાની સંસ્કૃતિ પ્રત્યે ગર્વ રાખવા હાકલ કરી હતી.
ભદોહીમાં આપવામાં આવેલું આ નિવેદન આગામી સમયમાં મોટી રાજકીય ચર્ચાનું કેન્દ્ર બની શકે છે. અપર્ણા યાદવના આ તેવર ભાજપની હિંદુત્વની લાઇનને વધુ મજબૂત કરતા જોવા મળી રહ્યા છે. સંમેલનમાં હાજર હજારોની મેદનીએ તેમના ભાષણને વધાવી લીધું હતું, જ્યારે વિરોધ પક્ષોએ આ નિવેદનને સમાજમાં વિભાજન પાડનારૂ ગણાવ્યું છે.