નવી દિલ્હી : ભારતીય અવકાશ સંશોધન સંગઠન (ISRO) એ ગગનયાન મિશનની સફળતા તરફ વધુ એક સુવર્ણ પ્રકરણ ઉમેર્યું છે. ૧૮ અને ૧૯ ડિસેમ્બરના રોજ ચંદીગઢની TBRL સુવિધા ખાતે 'ડ્રોગ પેરાશૂટ'નું અત્યંત જટિલ પરીક્ષણ કરવામાં આવ્યું હતું. આ પેરાશૂટ કોઈ સામાન્ય પેરાશૂટ નથી, પરંતુ તે ગગનયાનના 'ક્રૂ મોડ્યુલ' ને અંતરિક્ષમાંથી પૃથ્વીના વાતાવરણમાં પ્રવેશતી વખતે સ્થિર રાખવા અને તેની ભયાનક ગતિને ધીમી કરવા માટે બનાવવામાં આવ્યું છે. કેન્દ્રીય મંત્રી ડૉ. જીતેન્દ્ર સિંહે આ સફળતાને ભારતની અંતરિક્ષ તાકાતનું પ્રતીક ગણાવી વૈજ્ઞાનિકોને અભિનંદન પાઠવ્યા હતા.

ગગનયાનની લેન્ડિંગ સિસ્ટમ એટલી જટિલ છે કે તેમાં કુલ ૧૦ પેરાશૂટની શ્રેણી કામ કરે છે. આ પ્રક્રિયાની શરૂઆત બે એપેક્સ કવર સેપરેશન પેરાશૂટથી થાય છે, ત્યારબાદ મુખ્ય ભૂમિકામાં 'ડ્રોગ પેરાશૂટ' આવે છે. જ્યારે અવકાશયાન અત્યંત વેગ સાથે નીચે આવી રહ્યું હોય, ત્યારે આ ડ્રોગ પેરાશૂટ તેને હવામાં લહેરાતું અટકાવે છે અને ગતિમાં મોટો ઘટાડો કરે છે. આ તબક્કો સફળ થયા બાદ જ ત્રણ પાયલોટ પેરાશૂટ ખુલે છે, જે આખરે વિશાળ કદના ત્રણ મુખ્ય પેરાશૂટને ખોલે છે, જેથી આપણા અવકાશયાત્રીઓ ફૂલની જેમ હળવાશથી પૃથ્વી પર ઉતરી શકે.

આ સફળ પરીક્ષણે વિવિધ પ્રતિકૂળ ફ્લાઇટ પરિસ્થિતિઓમાં ભારતીય ટેકનોલોજીની વિશ્વસનીયતા સાબિત કરી દીધી છે. ઈસરો હવે આગામી વર્ષે હાથ ધરવામાં આવનાર માનવરહિત ટ્રાયલ રન માટે સજ્જ છે. આ પેરાશૂટ સિસ્ટમની સફળતાએ એ સાબિત કર્યું છે કે ભારત પોતાના અવકાશયાત્રીઓની સુરક્ષા માટે વિશ્વસ્તરીય ટેકનોલોજી વિકસાવવામાં આત્મનિર્ભર બની ગયું છે. હવે આખી દુનિયાની નજર ભારતના પ્રથમ માનવસહિત મિશન પર ટકેલી છે, જે ભારતને અવકાશમાં માનવ મોકલનાર વિશ્વનો ચોથો દેશ બનાવશે.