બેંગલુરુ, તા.૨૦ : ભારતીય નારીના શૃંગારમાં સાડીનું સ્થાન હંમેશા સર્વોપરી રહ્યું છે, પરંતુ શું તમે ક્યારેય એવી સાડી વિશે સાંભળ્યું છે જેની કિંમતમાં એક આખું ઘર ખરીદી શકાય? વિશ્વ સાડી દિવસ 2025 ના અવસરે ચર્ચામાં છે 'વિવાહ પટ્ટુ કાંજીવરમ' સાડી. ચેન્નાઈ સિલ્ક્સ દ્વારા તૈયાર કરવામાં આવેલી આ સાડી વિશ્વની સૌથી મોંઘી સાડી તરીકે ગિનીસ વર્લ્ડ રેકોર્ડ ધરાવે છે. ₹39,31,627 ની કિંમત ધરાવતી આ સાડી માત્ર કપડું નથી, પરંતુ ઝવેરાત અને કલાનો અદભૂત સંગમ છે.

સોના-ચાંદી અને નવરત્નોનો શણગાર

આ સાડીની ભવ્યતાનો અંદાજ એ વાત પરથી લગાવી શકાય છે કે તેમાં 59.7 ગ્રામ શુદ્ધ સોનું, 3.9 કેરેટના હીરા, 5 કેરેટના નીલમ (સેફાયર) ઉપરાંત પ્લેટિનમ, ચાંદી, માણેક અને મોતી જેવા કિંમતી રત્નોનો ઉપયોગ કરવામાં આવ્યો છે. લગભગ 8 કિલો વજન ધરાવતી આ સાડીને વણવામાં 36 કુશળ કારીગરોએ અંદાજે 4,760 કલાકની સખત મહેનત કરી હતી. 'ડબલ વાર્પ' ટેકનિકથી હાથથી વણાયેલી આ સાડીમાં 64 અલગ-અલગ રંગોના શેડ્સનો ઉપયોગ કરવામાં આવ્યો છે.

રાજા રવિ વર્માની ચિત્રકલાનો જાદુ

આ સાડીને જે બાબત સૌથી અલગ પાડે છે તે છે તેના પર કંડારાયેલી કલા. ભારતના મહાન ચિત્રકાર રાજા રવિ વર્માના 11 વિશ્વપ્રસિદ્ધ ચિત્રોની પ્રતિકૃતિ આ સાડી પર વણવામાં આવી છે. સાડીના મુખ્ય ભાગમાં વર્માનું સુપ્રસિદ્ધ ચિત્ર 'ગેલેક્સી ઓફ મ્યુઝિશિયન્સ' (સંગીતકારોની આકાશગંગા) દર્શાવવામાં આવ્યું છે, જેમાં ભારતની ભૌગોલિક અને સાંસ્કૃતિક વિવિધતાને રજૂ કરતી 11 મહિલાઓ સંગીત વાદ્યો સાથે જોવા મળે છે. સિલ્કના તાર પર આટલી ઝીણવટભરી ચિત્રકલા ઉતારવી એ વણાટકામનો ઉત્કૃષ્ટ નમૂનો છે.

કોણે ખરીદી આ અણમોલ સાડી?

આ અદભૂત સાડીના અત્યાર સુધીમાં બે વર્ઝન તૈયાર થયા છે. મળતી માહિતી મુજબ, એક સાડી બેંગલુરુના એક ઉદ્યોગપતિએ પોતાની લગ્નની 10મી વર્ષગાંઠ નિમિત્તે પત્ની માટે ખરીદી હતી, જ્યારે બીજી સાડી 2009માં કુવૈત સ્થિત એક બિઝનેસમેને ખરીદી હતી. ભારતીય સંસ્કૃતિ અને ફેશનના પ્રતીક તરીકે આ સાડી આજે પણ સમગ્ર વિશ્વમાં આકર્ષણનું કેન્દ્ર બની રહી છે.