વોશિંગ્ટન: જેફરી એપસ્ટીન સેક્સ ટ્રાફિકિંગ કેસમાં અમેરિકન ન્યાય વિભાગ દ્વારા પારદર્શિતા લાવવાના દાવાઓ વચ્ચે એક નવી શંકાસ્પદ ઘટનાએ અમેરિકાના રાજકારણમાં ભૂકંપ સર્જ્યો છે. પ્રાપ્ત વિગતો અનુસાર, શુક્રવારે ન્યાય વિભાગની વેબસાઈટ પર એપસ્ટીન કેસને લગતા હજારો દસ્તાવેજો અપલોડ કરવામાં આવ્યા હતા, પરંતુ શનિવાર સુધીમાં તેમાંથી અચાનક ૧૬ જેટલી અતિ મહત્વની ફાઈલો ગાયબ થઈ જતા ભારે ચકચાર મચી છે. વિભાગ દ્વારા આ ફાઈલો કેમ હટાવવામાં આવી તે અંગે હજુ સુધી કોઈ સત્તાવાર સ્પષ્ટતા કરવામાં આવી નથી.

વિવાદનું કેન્દ્ર: ‘ગાયબ’ થયેલી તસ્વીર

સૂત્રોના જણાવ્યા અનુસાર, જે દસ્તાવેજો હટાવી લેવામાં આવ્યા છે તેમાં એક અત્યંત સંવેદનશીલ તસ્વીરનો પણ સમાવેશ થાય છે. આ કથિત તસ્વીરમાં અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ, તેમના પત્ની મેલેનિયા ટ્રમ્પ, કુખ્યાત જેફરી એપસ્ટીન અને તેની સહયોગી ગિસ્લેન મેક્સવેલ એકસાથે જોવા મળ્યા હતા. 

આ ઉપરાંત, કેટલીક વાંધાજનક કલાકૃતિઓ, નગ્ન મહિલાઓના ચિત્રો અને ફર્નિચરના ખાનાઓમાં છુપાવી રાખવામાં આવેલી તસ્વીરોનો કોલાજ પણ વેબસાઈટ પરથી હટાવી લેવામાં આવ્યો હોવાનો દાવો થઈ રહ્યો છે. આ ઘટના બાદ સોશિયલ મીડિયા પર એવી અટકળો તેજ બની છે કે પ્રભાવશાળી લોકોના નામો બચાવવા માટે આ ફાઈલો ડિલીટ કરવામાં આવી હોઈ શકે છે.

ડેમોક્રેટ્સનો હોબાળો અને ‘એક્સ’ પર પ્રહારો

આ ઘટના બાદ અમેરિકામાં રાજકીય માહોલ ગરમાયો છે. હાઉસ ઓવરસાઈટ કમિટીના ડેમોક્રેટ સભ્યોએ સોશિયલ મીડિયા પ્લેટફોર્મ ‘એક્સ’ (અગાઉનું ટ્વિટર) પર આકરા પ્રહારો કર્યા છે. તેમણે સવાલ ઉઠાવ્યો છે કે, "ટ્રમ્પની તસ્વીર કેમ હટાવવામાં આવી? હજુ બીજું શું શું છુપાવવામાં આવી રહ્યું છે? અમેરિકાની જનતાને સંપૂર્ણ પારદર્શિતાની જરૂર છે." 

ટેકનિકલ ખામી છે કે જાણી જોઈને કરાયેલું કૃત્ય, તે સવાલ હાલ ચર્ચાનું કેન્દ્ર બન્યો છે.

ખુલાસો અધૂરો હોવાનો પીડિતોનો આક્ષેપ

લાંબા સમયની રાહ જોયા બાદ એપસ્ટીન ફાઈલ્સ જાહેર તો કરવામાં આવી, પરંતુ પીડિતો અને ડેમોક્રેટ સાંસદોનું કહેવું છે કે આ ખુલાસો અધૂરો છે. જે દસ્તાવેજોની સૌથી વધુ રાહ જોવાતી હતી—જેમ કે પીડિતોના એફબીઆઈ ઈન્ટરવ્યુ અને આંતરિક તપાસની નોટ્સ—તે આ રિલીઝમાં સામેલ નહોતા. ખાસ કરીને ૨૦૦૦ના દાયકામાં એપસ્ટીનને મળેલી વિવાદાસ્પદ 'પ્લી ડીલ' અને તેને બચાવવામાં સંઘીય એજન્સીઓની ભૂમિકા પર ફરીથી સવાલો ઉભા થયા છે.

ન્યાય વિભાગના આગામી ખુલાસા પર હવે આખી દુનિયાની નજર મંડાયેલી છે.