ન્યૂયોર્ક: ટેકનોલોજીની દુનિયાના બેતાજ બાદશાહ અને ટેસ્લાના સીઈઓ ઇલોન મસ્કે આર્થિક જગતમાં એક એવો ઈતિહાસ રચ્યો છે જેની કલ્પના કરવી પણ મુશ્કેલ છે. તાજેતરના અહેવાલો અને ફોર્બ્સ બિલિયોનેર્સ ઈન્ડેક્સના આંકડા મુજબ, ઇલોન મસ્ક ૭૦૦ અબજ ડોલરની નેટવર્થનો આંકડો પાર કરનારા વિશ્વના સૌપ્રથમ વ્યક્તિ બની ગયા છે. શુક્રવારે મોડી રાત્રે તેમની કુલ સંપત્તિ ૭૪૯ અબજ ડોલરના ઐતિહાસિક સ્તરે પહોંચી ગઈ હતી.

મસ્ક પર થયેલા આ 'પૈસાના વરસાદ' પાછળનું મુખ્ય કારણ અમેરિકાની ડેલાવેર સુપ્રીમ કોર્ટનો એક ચુકાદો છે. કોર્ટે મસ્કના ૨૦૧૮ના વિવાદિત સેલરી પેકેજ (પે પેકેજ) ને પુનઃસ્થાપિત કરવાનો આદેશ આપ્યો છે. ઉલ્લેખનીય છે કે, અગાઉ નીચલી કોર્ટે આ ૫૬ અબજ ડોલરના પેકેજને રદ કર્યું હતું, પરંતુ સુપ્રીમ કોર્ટે તેને "અન્યાયપૂર્ણ" ગણાવી મસ્કની તરફેણમાં ચુકાદો આપ્યો હતો. આ સમાચાર આવતાની સાથે જ ટેસ્લાના શેરોમાં જબરદસ્ત ઉછાળો આવ્યો હતો અને મસ્કની સંપત્તિ રોકેટ ગતિએ વધી હતી. 

મસ્કની એરોસ્પેસ કંપની સ્પેસ એક્સ ના આઇપીઓ આવવાની ચર્ચાઓએ પણ તેમની સંપત્તિમાં વધારો કરવામાં ભાગ ભજવ્યો છે.

ડિજિટલ મીડિયા અને પ્લેટફોર્મ એક્સ પર પણ મસ્કની આ સિદ્ધિ ચર્ચાના કેન્દ્રમાં છે. સૌથી ચોંકાવનારી વાત એ છે કે અમીરોની યાદીમાં મસ્કનું કોઈ નજીકનું હરીફ પણ નથી. 

હાલમાં વિશ્વના બીજા સૌથી ધનિક વ્યક્તિ ગૂગલના સહ-સ્થાપક લેરી પેજ છે, પરંતુ મસ્ક તેમની સંપત્તિ કરતા લગભગ ૫૦૦ અબજ ડોલર આગળ નીકળી ગયા છે. 

આ તફાવત એટલો મોટો છે કે આર્થિક નિષ્ણાતોના મતે મસ્ક હવે "પોતાની અલગ જ લીગ"માં છે. ૨૦૨૫ નું વર્ષ ઇલોન મસ્ક માટે આર્થિક રીતે સુવર્ણ વર્ષ સાબિત થયું છે.