મુંબઈ: હવાઈ મુસાફરી દરમિયાન એરપોર્ટ લાઉન્જમાં આરામ ફરમાવતા ગ્રાહકો માટે મોટા સમાચાર સામે આવ્યા છે. દેશની સૌથી મોટી ખાનગી બેંક HDFCએ તેના ડેબિટ કાર્ડના નિયમોમાં ધરખમ ફેરફાર કરવાની જાહેરાત કરી છે. આગામી 10 જાન્યુઆરીથી, ગ્રાહકો માત્ર તેમનું ડેબિટ કાર્ડ સ્વાઇપ કરીને એરપોર્ટ લાઉન્જમાં સીધો પ્રવેશ મેળવી શકશે નહીં. બેંકે હવે 'સ્વાઇપ એન્ડ એન્ટર' સિસ્ટમને બદલે નવી 'વાઉચર-આધારિત' સિસ્ટમ અમલમાં મૂકવાનો નિર્ણય લીધો છે, જેનો ઉદ્દેશ્ય લાઉન્જ સુવિધાને વધુ પ્રીમિયમ અને શરતી બનાવવાનો છે.
નવા નિયમો મુજબ, મફત લાઉન્જ એક્સેસ મેળવવી હવે પહેલા કરતા મોંઘી અને જટિલ બનશે. અગાઉ ગ્રાહકોએ એક ક્વાર્ટરમાં ₹5,000નો ખર્ચ કરવાનો રહેતો હતો, પરંતુ હવે આ મર્યાદા બમણી કરીને ₹10,000 કરી દેવામાં આવી છે. એટલે કે, જો તમે આગામી ત્રણ મહિનામાં તમારા ડેબિટ કાર્ડથી લઘુત્તમ ₹10,000નો ખર્ચ કરશો, તો જ તમે મફત લાઉન્જ સુવિધા માટે લાયક ગણાશો. જોકે, બેંકે તેના પ્રીમિયમ 'ઇન્ફિનિટી' કાર્ડ ધારકોને આ ખર્ચ મર્યાદામાંથી મુક્તિ આપી છે, જેઓ પહેલાની જેમ જ કોઈપણ શરત વગર લાઉન્જ એક્સેસનો આનંદ માણી શકશે.
મહત્વની વાત એ છે કે, દરેક પ્રકારનો ખર્ચ આ મર્યાદામાં ગણવામાં આવશે નહીં. બેંકે સ્પષ્ટ કર્યું છે કે માત્ર ઓનલાઈન શોપિંગ અથવા સ્ટોર પર કરેલા વ્યવહારો જ માન્ય રહેશે. ATMમાંથી રોકડ ઉપાડ, UPI પેમેન્ટ, વોલેટ લોડિંગ અથવા બિલ પેમેન્ટ જેવી લેવડદેવડને આ ₹10,000ના ટાર્ગેટમાં સામેલ કરવામાં આવશે નહીં. એકવાર ખર્ચનો ટાર્ગેટ પૂરો થયા પછી, બેંક બે દિવસમાં ગ્રાહકને SMS અથવા ઈમેલ દ્વારા એક લિંક મોકલશે, જેના પરથી ગ્રાહકે પોતાનું વાઉચર જનરેટ કરવાનું રહેશે. આ વાઉચર અથવા QR કોડ બતાવ્યા પછી જ લાઉન્જમાં એન્ટ્રી મળી શકશે.
લાઉન્જમાં પ્રવેશવાની સંખ્યામાં કોઈ ફેરફાર કરવામાં આવ્યો નથી, પરંતુ તેની પ્રક્રિયા હવે વધુ ચોકસાઈ માંગી લેશે. મિલેનિયા અને ટાઇમ્સ પોઈન્ટ્સ કાર્ડ પર ક્વાર્ટરમાં એક મુલાકાત, જ્યારે પ્લેટિનમ કાર્ડ પર બે મુલાકાતની સુવિધા યથાવત છે. આ વાઉચર જે તે ક્વાર્ટરના અંત સુધી માન્ય રહેશે અને લાઉન્જમાં પ્રવેશ 'વહેલા તે પહેલા'ના ધોરણે મળશે. આ ફેરફારથી એવા ગ્રાહકોને અસર થશે જેઓ માત્ર લાઉન્જ સુવિધા માટે જ કાર્ડ રાખતા હતા, કારણ કે હવે સુવિધા મેળવવા માટે કાર્ડનો સક્રિય ઉપયોગ અનિવાર્ય બની ગયો છે.