ચંદીગઢ : પંજાબની ભગવંત માન સરકારે રવિવારે એક યુગલક્ષી નિર્ણય લેતા રાજ્યના ત્રણ અતિ મહત્વના ધાર્મિક શહેરોમાં માંસ, દારૂ, ગુટખા અને અન્ય તમામ પ્રકારના નશીલા પદાર્થો પર અનિશ્ચિત સમય માટે પ્રતિબંધ મૂકી દીધો છે. પંજાબ કેબિનેટ દ્વારા બહાર પાડવામાં આવેલા સત્તાવાર જાહેરનામા મુજબ, અમૃતસરનું ઐતિહાસિક દિવાલવાળું શહેર, તલવંડી સાબો અને શ્રી આનંદપુર સાહિબને હવેથી 'પવિત્ર શહેર' (Holy City) નો દરજ્જો આપવામાં આવ્યો છે. મુખ્યમંત્રીએ સ્પષ્ટ કર્યું છે કે આ શહેરોની આસપાસના નિર્ધારિત વિસ્તારોમાં કોઈ પણ પ્રકારના વ્યસનયુક્ત પદાર્થોનું વેચાણ ગુનો ગણાશે. આ નિર્ણયનો હેતુ આ પવિત્ર સ્થળોની ધાર્મિક આસ્થા અને પવિત્રતાને જાળવી રાખવાનો છે.

આ નિર્ણય પાછળનું મુખ્ય કારણ શીખ ધર્મના પાંચ પવિત્ર તખ્તો પૈકીના ત્રણ તખ્તો આ શહેરોમાં આવેલા છે તે છે. અમૃતસરમાં શ્રી અકાલ તખ્ત સાહિબ, તલવંડી સાબોમાં શ્રી દમદમા સાહિબ અને આનંદપુર સાહિબમાં શ્રી કેસગઢ સાહિબ સ્થિત છે, જે વિશ્વભરના શીખો માટે આસ્થાના કેન્દ્રો છે. ઉલ્લેખનીય છે કે, ગયા મહિને શ્રી ગુરુ તેગ બહાદુરજીના ૩૫૦માં શહીદી પર્વ નિમિત્તે પંજાબ વિધાનસભાના ખાસ સત્રમાં આ ઠરાવ સર્વાનુમતે પસાર કરવામાં આવ્યો હતો. સરકારના આ પગલાને ધાર્મિક સંગઠનો અને સ્થાનિક લોકો દ્વારા આવકારવામાં આવ્યો છે, કારણ કે લાંબા સમયથી આ સ્થળોને 'ડ્રાય અને વેજિટેરિયન ઝોન' જાહેર કરવાની માંગ ઉઠી રહી હતી.

મુખ્યમંત્રી ભગવંત માને પોતાના વીડિયો સંદેશમાં જણાવ્યું હતું કે આ ત્રણ શહેરો માત્ર ભૌગોલિક વિસ્તારો નથી, પરંતુ આધ્યાત્મિકતાના પ્રતિક છે. પવિત્ર શહેરનો દરજ્જો મળ્યા બાદ હવે આ વિસ્તારોમાં પોલીસ અને સ્થાનિક તંત્ર દ્વારા કડક પેટ્રોલિંગ કરવામાં આવશે જેથી પ્રતિબંધિત વસ્તુઓનું વેચાણ અટકાવી શકાય. આ આદેશ તાત્કાલિક અસરથી અમલમાં આવી ગયો છે, અને હવે આ વિસ્તારોમાં માત્ર સાત્વિક વાતાવરણ જ જોવા મળશે. સરકારના આ નિર્ણયથી આ તીર્થધામોમાં આવતા શ્રદ્ધાળુઓ માટે વધુ શુદ્ધ અને શાંતિપૂર્ણ અનુભવની અપેક્ષા રાખવામાં આવી રહી છે.