નવી દિલ્હી : શનિવારે ન્યૂઝીલેન્ડના ઓકલેન્ડમાં શીખ સમુદાય દ્વારા આયોજિત વાર્ષિક નગર કીર્તન પરેડ દરમિયાન કેટલાક સ્થાનિક લોકોએ વિરોધ કર્યો ત્યારે વિવાદ ઉભો થયો. ગુરુ નાનક જયંતિની ઉજવણી માટે આ પરેડનું આયોજન કરવામાં આવ્યું હતું. પરેડ પરત ફરી રહી હતી ત્યારે, ડેસ્ટિની ચર્ચ સાથે જોડાયેલા જૂથ "ટ્રુ પેટ્રિયોટ્સ ઓફ ન્યુઝીલેન્ડ" ના સભ્યો શેરીમાં ઉભા રહ્યા અને હકા કરવાનું શરૂ કર્યું.

   હકા વિરોધીઓ પાછળ એક કાળો બેનર લહેરાતો હતો, જેના પર લખ્યું હતું, "આ ન્યુઝીલેન્ડ છે, ભારત નહીં." સોશિયલ મીડિયા પર ફરતા વીડિયોમાં વિરોધીઓ રસ્તાની એક બાજુ હકા કરી રહ્યા હતા, જ્યારે નગર કીર્તનમાં ભાગ લેતા શીખ સમુદાયના સભ્યો થોડા અંતરે ઉભા હતા.

મીડિયા રિપોર્ટ્સ અનુસાર, નગર કીર્તન પરેડ માટે ઓકલેન્ડ કાઉન્સિલ તરફથી પરવાનગી મળી ગઈ હતી. ઘટનાની માહિતી મળતાં, પોલીસ ઘટનાસ્થળે પહોંચી અને પરિસ્થિતિને કાબૂમાં લીધી. ત્યારબાદ પરેડને સુરક્ષિત રીતે આગળ વધવા દેવામાં આવી. પોલીસે સ્પષ્ટતા કરી કે ઘટના દરમિયાન કોઈ ધરપકડ કરવામાં આવી નથી.

   ફ્રી સ્પીચ યુનિયને પણ આ ઘટનાની ટીકા કરી હતી. સ્થાનિક મીડિયા અહેવાલો અનુસાર, ફ્રી સ્પીચ યુનિયનના એક્ઝિક્યુટિવ હેડ જિલિયન હીથરે જણાવ્યું હતું કે, "પરેડ, ભાષણ અથવા સમુદાયોના વાણી સ્વાતંત્ર્ય અને સંગઠનના અધિકારના ઉપયોગ સાથે શારીરિક રીતે દખલ કરવી એ એક મર્યાદા ઓળંગવા જેવું છે. જ્યારે 50 લોકો નગર કીર્તન શોભાયાત્રાને રોકવા માટે અવરોધ ઊભો કરે છે, ત્યારે તે પ્રતિ-વિરોધ નથી; તે એક અવરોધ છે જે અન્ય લોકોને તેમનો કાયદેસર અભિપ્રાય વ્યક્ત કરતા અટકાવે છે."

  આ મુદ્દાને સોશિયલ મીડિયા પર પણ અલગ રીતે રજૂ કરવામાં આવી રહ્યો છે, જેમાં શીખ સમુદાય ખાલિસ્તાની હોવાના આરોપો લગાવવામાં આવી રહ્યા છે. કિર્ક લુબિમોવ નામના વ્યક્તિએ સોશિયલ મીડિયા સાઇટ X પર એક વીડિયો શેર કર્યો અને લખ્યું, "આ ખાલિસ્તાની પરોપજીવી બધે કેમ છે? તેઓ વંદોની જેમ બધે ફેલાઈ રહ્યા છે. ન્યુઝીલેન્ડમાં દેશભક્તોએ વિદેશીઓની પરેડને તેમની શેરીઓ પર કબજો કરતા અટકાવી અને પાછળ હટ્યા નહીં."