મુર્શિદાબાદ : પશ્ચિમ બંગાળના મુર્શિદાબાદ જિલ્લામાં રાજકીય પારો અત્યારે ચરમસીમાએ છે. તૃણમૂલ કોંગ્રેસમાંથી સસ્પેન્ડ થયેલા દિગ્ગજ નેતા હુમાયુ કબીરે મમતા બેનર્જી સામે ખુલ્લો પડકાર ફેંકતા નવી પાર્ટી બનાવવાની જાહેરાત કરી દીધી છે. સોમવારે મુર્શિદાબાદમાં એક વિશાળ જનસભા યોજીને તેઓ સત્તાવાર રીતે પક્ષનું લોન્ચિંગ કરશે. હુમાયુ કબીરનો દાવો છે કે તેઓ આગામી વિધાનસભા ચૂંટણીમાં રાજ્યની તમામ ૨૯૪ બેઠકો પર પોતાના ઉમેદવારો ઉભા રાખશે. બાબરી મસ્જિદના પુનઃનિર્માણના શિલાન્યાસ અને તેના શ્રેય બાબતે મમતા બેનર્જી સાથેના મતભેદો બાદ કબીરે હવે પોતાની અલગ રાહ પકડવાનું નક્કી કર્યું છે, જે ટીએમસી માટે ચિંતાનો વિષય બની શકે છે.

આ નવી પાર્ટીના આગમન સાથે જ મુર્શિદાબાદમાં પોસ્ટર વોર શરૂ થઈ ગયું છે. કબીરે ચૂંટણી પંચ પાસે 'ટેબલ' સહિત ત્રણ ચૂંટણી પ્રતીકોની માંગણી કરી છે અને તેઓ મુર્શિદાબાદની ૨૨ માંથી ઓછામાં ઓછી ૧૦ બેઠકો જીતવાનો આત્મવિશ્વાસ ધરાવે છે. હાલમાં આ જિલ્લામાં ટીએમસીનું વર્ચસ્વ છે, પરંતુ હુમાયુ કબીરના અલગ થવાથી મુસ્લિમ મતોના ધ્રુવીકરણમાં મોટો ફેરફાર આવી શકે છે. તેમણે સંકેત આપ્યા છે કે તેઓ ભાજપ અને ટીએમસી બંનેને હરાવવા માટે કોંગ્રેસ, ડાબેરી પક્ષો અને અસદુદ્દીન ઓવૈસીની પાર્ટી સાથે ગઠબંધન કરવા માટે પણ તૈયાર છે.

આવતીકાલના કાર્યક્રમ માટે મુર્શિદાબાદમાં ભવ્ય સ્ટેજ તૈયાર કરવામાં આવ્યા છે, જ્યાં અંદાજે ચાર લાખ લોકોના એકઠા થવાનો દાવો કરવામાં આવી રહ્યો છે. હુમાયુ કબીર પોતાને આગામી સરકારમાં 'કિંગમેકર' તરીકે જોઈ રહ્યા છે. જો તેઓ અલ્પસંખ્યક મતોમાં ગાબડું પાડવામાં સફળ રહેશે, તો મમતા બેનર્જીની વોટબેંકને મોટું નુકસાન થઈ શકે છે. બંગાળના રાજકારણમાં અત્યાર સુધી મમતા વિરુદ્ધ ભાજપનો જંગ હતો, પરંતુ હવે હુમાયુ કબીરના ત્રીજા મોરચાના પ્રવેશથી આવતા વર્ષની ચૂંટણીઓ વધુ રસપ્રદ અને ત્રિપાંખિયા જંગ જેવી બની રહેશે.