નવી દિલ્હી, તા. ૨૨ ડિસેમ્બર ૨૦૨૫ : સમગ્ર ઉત્તર ભારત અત્યારે હાડ થીજવતી ઠંડી અને ગાઢ ધુમ્મસની લપેટમાં છે. પશ્ચિમી વિક્ષોભના કારણે હવામાનમાં આવેલા અચાનક પલટાએ પહાડી રાજ્યોમાં હિમવર્ષા અને મેદાની વિસ્તારોમાં શીતલહેરનું સામ્રાજ્ય જમાવ્યું છે. કાશ્મીરથી લઈને દિલ્હી સુધી ઠંડીના કારણે જનજીવન થંભી ગયું છે, જેની સીધી અસર વાહનવ્યવહાર પર પડી રહી છે.
હવાઈ અને રેલ વ્યવહારને મોટો ફટકો
રવિવાર અને સોમવારે દિલ્હી-NCR સહિતના વિસ્તારોમાં છવાયેલા ગાઢ ધુમ્મસના કારણે વિઝિબિલિટી શૂન્યની નજીક પહોંચી ગઈ હતી. જેના પરિણામે દિલ્હીના ઈન્દિરા ગાંધી ઈન્ટરનેશનલ એરપોર્ટ પર ૧૧૦ ફ્લાઈટ્સ રદ કરવામાં આવી છે અને ૪૫૦ થી વધુ ફ્લાઈટ્સ મોડી પડી છે. શ્રીનગરમાં ૧૧ અને અયોધ્યામાં ૨ ફ્લાઈટ્સ રદ થઈ છે. રેલવેની વાત કરીએ તો, રાજધાની, શતાબ્દી અને વંદે ભારત જેવી ૭૦ થી વધુ પ્રીમિયમ ટ્રેનો ૨ થી ૪ કલાક મોડી દોડી રહી છે.
કાશ્મીરમાં ‘ચિલ્લે કલાન’નો પ્રારંભ
કાશ્મીર ખીણમાં શિયાળાના સૌથી કઠોર ૪૦ દિવસના સમયગાળા ‘ચિલ્લે કલાન’નો પ્રારંભ થઈ ગયો છે. ગુલમર્ગમાં છ ઇંચ જેટલી બરફવર્ષા નોંધાઈ છે, જ્યારે હિમાચલના રોહતાંગ અને શિંકુલા પાસ પર પણ બરફની ચાદર છવાઈ છે. લદ્દાખ અને લેહમાં પણ ભારે હિમવર્ષાને કારણે તાપમાન માઈનસમાં સરકી ગયું છે.
રાજ્યોની સ્થિતિ: યુપીમાં રેડ એલર્ટ
હવામાન વિભાગે ઉત્તર પ્રદેશમાં આગામી એક સપ્તાહ સુધી ભયાનક ઠંડી અને ધુમ્મસની ચેતવણી સાથે ‘રેડ એલર્ટ’ જાહેર કર્યું છે. રવિવારે યુપીમાં બુલંદશહેર ૭ ડિગ્રી સાથે સૌથી ઠંડુ રહ્યું હતું, જ્યારે હરિયાણાના નારનૌલમાં લઘુત્તમ તાપમાન ૫.૨ ડિગ્રી સેલ્સિયસ નોંધાયું હતું. દિલ્હીમાં ઠંડીની સાથે પ્રદૂષણ પણ વધ્યું છે, જ્યાં એર ક્વોલિટી ઈન્ડેક્સ (AQI) ૩૮૬ સાથે ‘ખૂબ જ ખરાબ’ શ્રેણીમાં પહોંચ્યો છે.
પર્યાવરણ પર ખતરો
હવામાનમાં આવી રહેલા આ ફેરફારો વચ્ચે વૈજ્ઞાનિકોએ ચેતવણી આપી છે કે સદીના અંત સુધીમાં એમેઝોનના ૩૮% જંગલો લુપ્ત થવાના આરે છે, જે વૈશ્વિક આબોહવા પ્રણાલી પર ગંભીર અસર કરી શકે છે. હાલમાં ઉત્તર ભારતમાં આગામી કેટલાક દિવસો સુધી ઠંડીથી રાહત મળવાની કોઈ શક્યતા દેખાઈ રહી નથી.