ઇસ્લામાબાદ, તા. ૨૨ : પાકિસ્તાનના સંરક્ષણ દળના વડા ફિલ્ડ માર્શલ અસીમ મુનીરે ફરી એકવાર ભારત સામેના સૈન્ય સંઘર્ષમાં ધર્મનો સહારો લઈને વિવાદાસ્પદ નિવેદન આપ્યું છે. ઇસ્લામાબાદમાં આયોજિત 'રાષ્ટ્રીય ઉલેમા પરિષદ' ને સંબોધતા મુનીરે દાવો કર્યો હતો કે, મે મહિનામાં ભારત દ્વારા કરવામાં આવેલા 'ઓપરેશન સિંદૂર' દરમિયાન પાકિસ્તાનને "દૈવી મદદ" (Divine Help) મળી હતી. તેમણે પાકિસ્તાની રાજ્યની તુલના ૧,૪૦૦ વર્ષ પહેલા પયગંબર દ્વારા સ્થાપિત આરબ રાજ્ય સાથે કરી હતી.
ઓપરેશન સિંદૂર અને સૈન્ય ટકરાવ
નોંધનીય છે કે, પહેલગામમાં થયેલા આતંકી હુમલામાં ૨૬ ભારતીય નાગરિકોના મોત બાદ ભારતે ૭ મેના રોજ 'ઓપરેશન સિંદૂર' શરૂ કર્યું હતું. જેમાં પાકિસ્તાન અને PoK માં સ્થિત આતંકવાદી ઠેકાણાઓને નેસ્તનાબૂદ કરવામાં આવ્યા હતા. આ દરમિયાન બંને દેશો વચ્ચે ચાર દિવસ સુધી ભારે ગોળીબાર થયો હતો. આ હારને છુપાવવા માટે હવે અસીમ મુનીર કુરાનની આયતો ટાંકીને તેને ઈશ્વરીય મદદ ગણાવી રહ્યા છે. રવિવારે પાકિસ્તાની ન્યૂઝ ચેનલો પર આ ભાષણની ક્લિપ્સ પ્રસારિત કરવામાં આવી હતી.
અફઘાનિસ્તાનને અલ્ટીમેટમ: "અમારા બાળકોનું લોહી વહેવડાવવાનું બંધ કરો"
મુનીરે અફઘાનિસ્તાનના તાલિબાન શાસન પર પણ આકરા પ્રહારો કર્યા હતા. તેમણે કહ્યું કે પાકિસ્તાનમાં હુમલા કરતા 'તહરીક-એ-તાલિબાન પાકિસ્તાન' (TTP) ના ૭૦ ટકા આતંકીઓ અફઘાન નાગરિકો છે. તેમણે સ્પષ્ટ શબ્દોમાં કહ્યું કે, "તાલિબાને હવે નક્કી કરવું પડશે કે તેઓ આતંકી સંગઠન TTP ને સાથ આપવા માંગે છે કે પાકિસ્તાનને." તેમણે ઉમેર્યું હતું કે અફઘાનિસ્તાન પાકિસ્તાની બાળકોનું લોહી વહેવડાવી રહ્યું છે જે સહન કરવામાં આવશે નહીં.
જેહાદ માત્ર રાજ્યના આદેશ પર જ થઈ શકે
ધાર્મિક નેતાઓને સંબોધતા મુનીરે કહ્યું કે, કોઈ પણ વ્યક્તિ પોતાની રીતે 'જેહાદ' નો ફતવો જારી કરી શકે નહીં. ઈસ્લામિક કાયદા મુજબ, માત્ર સત્તાવાર રાજ્ય જ જેહાદનો આદેશ આપી શકે છે. તેમના આખા ભાષણમાં ઇસ્લામિક સંદર્ભોનો પુષ્કળ ઉપયોગ કરવામાં આવ્યો હતો. તેમણે એમ પણ કહ્યું કે દુનિયાના ૫૭ મુસ્લિમ દેશોમાં પાકિસ્તાન પાસે મક્કા અને મદીનાના રક્ષક બનવાનું વિશેષ સન્માન છે.
નિષ્ણાતો માને છે કે પાકિસ્તાનની આર્થિક અને આંતરિક સુરક્ષાની નિષ્ફળતાઓ પરથી જનતાનું ધ્યાન ભટકાવવા માટે સૈન્ય પ્રમુખ હવે કટ્ટર ધાર્મિક કાર્ડ રમી રહ્યા છે.