વેન્ઝોઉ (ચીન), તા. ૨૨ : આજના સમયમાં જ્યારે ઘણી કંપનીઓ કર્મચારીઓની છટણી કરી રહી છે, ત્યારે ચીનની એક ટેક કંપનીએ દુનિયાને ચોંકાવી દે તેવી જાહેરાત કરી છે. દક્ષિણપૂર્વ ચીનના ઝેજિયાંગ પ્રાંતમાં આવેલી 'ઝેજિયાંગ ગુઓશેંગ ઓટોમોટિવ ટેકનોલોજી' કંપનીએ તેના વફાદાર કર્મચારીઓને પ્રોત્સાહિત કરવા માટે 'પાંચ વર્ષની સેવા પર ફ્લેટ ભેટ' આપવાની યોજના રજૂ કરી છે. કંપનીનો ઉદ્દેશ્ય કુશળ ટેકનિકલ અને મેનેજમેન્ટ સ્ટાફને પોતાની સાથે લાંબા સમય સુધી જોડી રાખવાનો છે.
૧૦૦ થી ૧૫૦ ચોરસ મીટરના આલીશાન આવાસ
સાઉથ ચાઇના મોર્નિંગ પોસ્ટના અહેવાલ મુજબ, કંપનીના જનરલ મેનેજર વાંગ જિયાયુઆને ખુલાસો કર્યો છે કે આ ફ્લેટ કંપનીથી માત્ર ૫ કિલોમીટરની ત્રિજ્યામાં જ આવેલા છે. ૧૦૦ થી ૧૫૦ ચોરસ મીટર સુધીનો વિસ્તાર ધરાવતા આ ફ્લેટ સંપૂર્ણપણે ફર્નિશ્ડ અને નવીનીકૃત (Renovated) હશે. કંપનીએ આ પ્રોજેક્ટ માટે અત્યાર સુધીમાં ૧૦ મિલિયન યુઆન (આશરે ૧૧ કરોડ રૂપિયાથી વધુ) નું રોકાણ કર્યું છે.
કેવી રીતે મળશે આ સુવિધા?
કંપનીની યોજના મુજબ, જે કર્મચારીઓ ૫ વર્ષની સેવા પૂર્ણ કરશે, તેમને ફ્લેટની માલિકી ટ્રાન્સફર કરવામાં આવશે. આ વર્ષે પાંચ ફ્લેટનું વિતરણ કરી દેવામાં આવ્યું છે, જ્યારે આવતા વર્ષે વધુ આઠ ફ્લેટ આપવામાં આવશે. ત્રણ વર્ષના ગાળામાં કુલ ૧૮ ફ્લેટ આપવાનું કંપનીનું આયોજન છે. જોકે, એક શરત મુજબ કર્મચારીએ રહેવા ગયા બાદ ફ્લેટના રિન્યુએશન (નવીનીકરણ) નો ખર્ચ કંપનીને ચૂકવવો પડશે, પરંતુ પ્રોપર્ટીની મૂળ કિંમત કર્મચારી માટે બિલકુલ મફત રહેશે.
શહેરોમાંથી પ્રતિભાઓને આકર્ષવાનો પ્રયાસ
કંપનીના ચેરમેન તુ કૈકુને જણાવ્યું હતું કે, શાંઘાઈ અને સુઝોઉ જેવા મેટ્રો શહેરોમાંથી શ્રેષ્ઠ એન્જિનિયરો અને મેનેજરોને વેન્ઝોઉ જેવા નાના શહેરમાં લાવવા અને સ્થાયી કરવા માટે આ પ્રકારના આકર્ષક પુરસ્કારો જરૂરી છે. આ કંપની ઓટોમોટિવ પાર્ટ્સ બનાવવામાં નિષ્ણાત છે અને તેની પાસે ૪૫૦ થી વધુ કર્મચારીઓ છે. કંપનીનું વાર્ષિક ઉત્પાદન મૂલ્ય અંદાજે ૪૯૦ મિલિયન યુઆન છે. આ અનોખી પહેલને કારણે હવે ચીનમાં અન્ય કંપનીઓ પર પણ કર્મચારી કલ્યાણ માટે દબાણ વધ્યું છે.