નવી દિલ્હી : અમેરિકામાં નોકરી કરવાનું સ્વપ્ન જોતા ભારતીયો માટે વિઝા મેળવવાની પ્રક્રિયા હવે વધુ જટિલ અને કડક બની ગઈ છે. ભારતમાં સ્થિત યુએસ એમ્બેસીએ H1B અને H4 વિઝા અરજદારો માટે વૈશ્વિક સ્તરે 'એલર્ટ' જારી કર્યું છે. અમેરિકી વિદેશ વિભાગે ૧૫ ડિસેમ્બર, ૨૦૨૫થી વિઝા સ્ક્રિનિંગની પ્રક્રિયામાં વ્યાપક ફેરફારો કર્યા છે, જેની સીધી અસર વિઝા પ્રોસેસિંગના સમય પર પડશે. હવે અરજદારોએ વિઝા મંજૂરી માટે અગાઉ કરતા વધુ લાંબી રાહ જોવી પડી શકે છે.
સોશિયલ મીડિયા હાજરીની થશે ઝીણવટભરી તપાસ
નવા નિયમો મુજબ, હવે અમેરિકા માત્ર તમારા દસ્તાવેજો જ નહીં, પરંતુ તમારી ઓનલાઇન હાજરીની પણ તપાસ કરશે. સ્ટેટ ડિપાર્ટમેન્ટે તમામ રાષ્ટ્રીયતાના H1B અને H4 અરજદારો માટે 'ઓનલાઇન હાજરી સમીક્ષા' ફરજિયાત બનાવી છે. આ અંતર્ગત અરજદારોના સોશિયલ મીડિયા એકાઉન્ટ્સ, છેલ્લા કેટલાક વર્ષોમાં વપરાયેલા ફોન નંબર્સ અને જૂના ઇમેઇલ એડ્રેસની પણ ચકાસણી કરવામાં આવશે. આ ફેરફાર પાછળનો હેતુ વિઝા પ્રોગ્રામના દુરુપયોગને રોકવાનો અને સુરક્ષા માપદંડોને વધુ મજબૂત કરવાનો છે.
એપોઈન્ટમેન્ટ્સમાં અચાનક વિલંબથી મુશ્કેલી
આ મહિનાની શરૂઆતમાં જ સેંકડો ભારતીય વિઝા ધારકો પોતાની વર્ક પરમિટ રિન્યુ કરાવવા માટે ભારત આવ્યા હતા, પરંતુ નવી સોશિયલ મીડિયા તપાસ નીતિને કારણે તેમની એપોઈન્ટમેન્ટ્સ અચાનક આવતા વર્ષ સુધી લંબાવી દેવામાં આવી છે. યુએસ એમ્બેસીએ સ્પષ્ટપણે જણાવ્યું છે કે, "અમે વિઝા અરજીઓ સ્વીકારવાનું ચાલુ રાખ્યું છે, પરંતુ વધારાના પ્રોસેસિંગ સમયને ધ્યાનમાં રાખીને અરજદારોએ શક્ય તેટલી વહેલી તકે અરજી કરવી જોઈએ."
નિયમો કેમ કડક કરવામાં આવ્યા?
અમેરિકી વહીવટીતંત્ર હવે વિઝા-મુક્ત દેશોના પ્રવાસીઓ સહિત તમામ મુસાફરોની ડિજિટલ ફૂટપ્રિન્ટ તપાસી રહ્યું છે. આ કડક સ્ક્રીનીંગ દ્વારા અમેરિકા એ ખાતરી કરવા માંગે છે કે દેશમાં આવનાર વ્યક્તિ કોઈ શંકાસ્પદ પ્રવૃત્તિમાં સામેલ નથી. આ નવા ફેરફારોને કારણે ખાસ કરીને ભારતીય આઈટી સેક્ટરના કર્મચારીઓ અને તેમના પરિવારો (H4 વિઝા ધારકો) માટે અનિશ્ચિતતાનો માહોલ સર્જાયો છે.