મુંબઈ: મહારાષ્ટ્રના વર્તમાન ડીજીપી રશ્મિ શુક્લા ૩૧મી ડિસેમ્બરે નિવૃત્ત થઈ રહ્યા છે, ત્યારે કેન્દ્ર સરકારે નેશનલ ઇન્વેસ્ટિગેશન એજન્સી (એન આઇ એ) ના ડાયરેક્ટર જનરલ અને ૧૯૯૦ બેચના આઈપીએસ અધિકારી સદાનંદ વસંત દાતેને તાત્કાલિક અસરથી તેમના પેરેન્ટ કેડર (મહારાષ્ટ્ર) માં પરત મોકલવાનો આદેશ કર્યો છે. મુંબઈ ૨૬/૧૧ હુમલાના 'હીરો' ગણાતા શ્રી દાતે હવે મહારાષ્ટ્ર પોલીસ દળનું સુકાન સંભાળે તેવી પ્રબળ શક્યતા છે.
મહારાષ્ટ્ર પોલીસ બેડામાં મોટા ફેરફારના સંકેત મળ્યા છે. કેન્દ્રના કાર્મિક મંત્રાલયે એક મહત્વપૂર્ણ આદેશ જારી કરીને એન.આઈ.એ. (ના વર્તમાન વડા અને મહારાષ્ટ્ર કેડરના ૧૯૯૦ બેચના વરિષ્ઠ આઈપીએસ અધિકારી સદાનંદ વસંત દાતેને તેમના મૂળ કેડરમાં પરત મોકલવાની મંજૂરી આપી દીધી છે. આ સાથે જ સદાનંદ દાતે મહારાષ્ટ્રના આગામી ડાયરેક્ટર જનરલ ઓફ પોલીસ બનશે તે લગભગ નક્કી માનવામાં આવે છે.
રશ્મિ શુક્લાની નિવૃત્તિ બાદ પદભાર સંભાળશે: મહારાષ્ટ્રના હાલના ડીજીપી રશ્મિ શુક્લાનો કાર્યકાળ આગામી ૩૧મી ડિસેમ્બર ૨૦૨૫ના રોજ પૂર્ણ થઈ રહ્યો છે. રાજ્ય સરકારે કેન્દ્ર સરકારને વિનંતી કરી હતી કે સદાનંદ દાતેને રાજ્યની સેવા માટે મુક્ત કરવામાં આવે, જેને કેન્દ્રએ સ્વીકારી લીધી છે. સુપ્રીમ કોર્ટની માર્ગદર્શિકા મુજબ, ડીજીપી તરીકે તેમની નિમણૂક બે વર્ષના ફિક્સ કાર્યકાળ માટે કરવામાં આવે તેવી શક્યતા છે, એટલે કે તેઓ ડિસેમ્બર ૨૦૨૭ સુધી આ પદ પર રહી શકે છે.
૨૬/૧૧ ના હુમલામાં આતંકી કસાબનો સામનો કર્યો હતો: સદાનંદ દાતેની છબી એક અત્યંત પ્રમાણિક અને બહાદુર અધિકારી તરીકેની છે. ૨૬/૧૧ ના મુંબઈ આતંકી હુમલા વખતે તેઓ જોઈન્ટ કમિશનર હતા અને કામયા હોસ્પિટલમાં આતંકવાદી અજમલ કસાબ અને તેના સાથીદારોનો સામનો કરતી વખતે તેઓ ઘાયલ થયા હતા. તેમના આ અદમ્ય સાહસ માટે તેમને રાષ્ટ્રપતિ દ્વારા વીરતા પુરસ્કાર (પોલીસ મેડલ ફોર ગેલેન્ટરી) થી સન્માનિત કરવામાં આવ્યા હતા.
કારકિર્દીના મુખ્ય પાસાઓ:  શિક્ષણ: પુણે યુનિવર્સિટીમાંથી ડોક્ટરેટ (પીએચડી) અને એમ.કોમ. ની ડિગ્રી ધરાવે છે. તેઓ 'ઇન્સ્ટિટ્યૂટ ઓફ કોસ્ટ એન્ડ મેનેજમેન્ટ એકાઉન્ટન્ટ્સ ઓફ ઇન્ડિયા' ના ક્વોલિફાઇડ સભ્ય પણ છે.
  અનુભવ: તેઓ મહારાષ્ટ્ર એ.ટી.એસ. ના વડા રહી ચૂક્યા છે. આ ઉપરાંત મીરા-ભાઈંદર વસઈ-વિરાર પોલીસ કમિશનરેટની સ્થાપના બાદ તેઓ ત્યાંના પ્રથમ પોલીસ કમિશનર બન્યા હતા. મુંબઈ પોલીસમાં ક્રાઈમ બ્રાન્ચ અને કાયદો-વ્યવસ્થા વિભાગમાં પણ તેમણે મહત્વની જવાબદારીઓ સંભાળી છે.
  વર્તમાન હોદ્દો: માર્ચ ૨૦૨૪ થી તેઓ દેશની સર્વોચ્ચ તપાસ એજન્સી એન.આઈ.એ. ના વડા તરીકે કાર્યરત હતા.
રાજ્ય સરકાર ચૂંટણી પછીના સમયગાળામાં પોલીસ તંત્રને વધુ મજબૂત અને કાર્યક્ષમ બનાવવા માટે સદાનંદ દાતે જેવા સ્વચ્છ પ્રતિભા ધરાવતા અધિકારીને સુકાન સોંપવા માગે છે તેવું મંત્રાલયના સૂત્રો જણાવી રહ્યા છે.