રાષ્ટ્રપતિ ડોનાલ્ડ ટ્રમ્પે અમેરિકી નૌકાદળ માટે અત્યાધુનિક યુદ્ધ જહાજો બનાવવાની યોજના જાહેર કરી છે. સાથે જ તેમણે ફરી એક વખત દાવો કર્યો છે કે તેમણે ભારત અને પાકિસ્તાન વચ્ચે પરમાણુ યુદ્ધ થતું અટકાવ્યું હતું.

અમેરિકાના રાષ્ટ્રપતિ ડોનાલ્ડ ટ્રમ્પે યુએસ નૌકાદળને વધુ શક્તિશાળી બનાવવા માટે એક મહત્ત્વાકાંક્ષી યોજના જાહેર કરી છે. ફ્લોરિડામાં તેમના માર-એ-લાગો રિસોર્ટ ખાતે જાહેરાત કરતા ટ્રમ્પે કહ્યું હતું કે, "અમે એવું યુદ્ધ જહાજ બનાવીશું જે અત્યાર સુધીના કોઈપણ જહાજ કરતા સૌથી ઝડપી, સૌથી મોટું અને સો ગણું વધુ શક્તિશાળી હશે." આ યોજના તેમના 'ગોલ્ડન ફ્લીટ' વિઝનનો એક ભાગ છે.

આ ઉપરાંત, ટ્રમ્પે વિદેશ નીતિ અંગે વાત કરતા ફરી એકવાર મોટો દાવો કર્યો હતો. તેમણે કહ્યું હતું કે તેમણે વિશ્વભરમાં આઠ જેટલા સંઘર્ષો ઉકેલ્યા છે. 

ભારત અને પાકિસ્તાન સંદર્ભે તેમણે પુનરોચ્ચાર કર્યો કે, "મેં પાકિસ્તાન અને ભારત વચ્ચે સંભવિત પરમાણુ યુદ્ધને અટકાવ્યું છે." તેમણે એમ પણ ઉમેર્યું હતું કે રશિયા અને યુક્રેન વચ્ચે પણ ઊંડી દુશ્મનાવટ છે, પરંતુ તેમની સરકાર પરિસ્થિતિને નિયંત્રિત કરી રહી છે.