શ્રીનગર  : જમ્મુ-કાશ્મીરમાં દેશ વિરોધી પ્રવૃત્તિઓ કરનારાઓ વિરુદ્ધ ભારત સરકાર અને તપાસ એજન્સીઓએ લાલ આંખ કરી છે. શ્રીનગરની ખાસ NIA કોર્ટે મંગળવારે એક ઐતિહાસિક નિર્ણય સંભળાવતા અમેરિકા સ્થિત કાશ્મીરી લોબિસ્ટ ગુલામ નબી શાહ, જે 'ડૉ. ફઈ' ના હુલામણા નામથી કુખ્યાત છે, તેની બડગામ જિલ્લામાં આવેલી સ્થાવર મિલકતો જપ્ત કરવાનો આદેશ આપ્યો છે. આ કાર્યવાહી 2020 ના UAPA (ગેરકાયદેસર પ્રવૃત્તિઓ અટકાયત અધિનિયમ) હેઠળના કેસમાં કરવામાં આવી છે.
જમીનનો કબજો લેવા તંત્રને કડક સૂચના
ખાસ ન્યાયાધીશ યાહયા ફિરદોસે આ આદેશ આપતા બડગામના જિલ્લા કલેક્ટરને સ્પષ્ટ સૂચના આપી છે કે, વડવાણ ગામ અને ચટ્ટાબુઘ ગામમાં આવેલી ડૉ. ફઈની માલિકીની કુલ 1.5 કનાલ (અંદાજે 8,000 ચોરસ ફૂટથી વધુ) જમીનનો તાત્કાલિક કબજો લેવામાં આવે. કોર્ટે મહેસૂલ અધિકારીઓને આ જમીનનું ચોક્કસ સીમાંકન કરવા અને પોલીસ વડાને જપ્તી દરમિયાન જરૂરી સુરક્ષા પૂરી પાડવા પણ આદેશ આપ્યો છે.
કોણ છે આ 'ડૉ. ફઈ'?
ગુલામ નબી શાહ ઉર્ફે ડૉ. ફઈ લાંબા સમયથી અમેરિકામાં રહીને ભારત વિરોધી પ્રચાર અને કાશ્મીર મુદ્દે આંતરરાષ્ટ્રીય સ્તરે ભ્રામક લોબિંગ કરવા માટે જાણીતો છે. અગાઉ તેને 2020 ના એક કેસમાં ભાગેડુ જાહેર કરવામાં આવ્યો હતો. તપાસ એજન્સીઓના મતે, તેની પ્રવૃત્તિઓ ભારતની અખંડિતતા માટે જોખમી છે અને તે વિદેશી ધરતી પરથી કાશ્મીરમાં અશાંતિ ફેલાવવાના ષડયંત્રોમાં સામેલ રહ્યો છે.
કાયદાનો ગાળિયો કસાયો
સહાયક સરકારી વકીલ મોહમ્મદ ઇકબાલ રાથેરની દલીલોને ગ્રાહ્ય રાખીને કોર્ટે BNSS ની કલમ 83 (જૂની CrPC ની જોગવાઈઓ મુજબ) હેઠળ આ મિલકત જપ્ત કરવાનો નિર્ણય લીધો છે. આ કાર્યવાહી એવા સમયે કરવામાં આવી છે જ્યારે કેન્દ્ર સરકાર કાશ્મીરમાં આતંકવાદીઓને ફંડિંગ પૂરું પાડનારા અને વિદેશમાં રહીને ભારત વિરોધી એજન્ડા ચલાવનારાઓનું નેટવર્ક તોડી પાડવા માટે આક્રમક અભિયાન ચલાવી રહી છે.
આ આદેશ સાથે જ સરકારે સ્પષ્ટ સંદેશ આપ્યો છે કે દુનિયાના કોઈપણ ખૂણે બેસીને ભારત વિરુદ્ધ ષડયંત્ર રચનારાઓની ભારતમાં રહેલી સંપત્તિ હવે સુરક્ષિત રહેશે નહીં.