કુવૈત સિટી : ખાડી દેશોમાં કામ કરતા લાખો ભારતીયો માટે કુવૈત સરકારે એક મહત્વપૂર્ણ જાહેરાત કરી છે. આજથી એટલે કે ૨૩ ડિસેમ્બર, ૨૦૨૫થી કુવૈતમાં પ્રવેશતા તમામ વિદેશી પ્રવાસીઓ અને ત્યાં રહેતા રહેવાસીઓ માટે માન્ય આરોગ્ય વીમો (Health Insurance) રાખવો ફરજિયાત બની ગયો છે. અહેવાલ મુજબ, આરોગ્ય મંત્રાલયે નવા એક્ઝિક્યુટિવ નિયમો લાગુ કર્યા છે, જેનો હેતુ દેશની આરોગ્યસંભાળ પ્રણાલીને વધુ સુદ્રઢ અને આર્થિક રીતે સુરક્ષિત બનાવવાનો છે.
કોને કેટલી ફી ચૂકવવી પડશે?
નવી નીતિ હેઠળ, લાંબા ગાળાના વિદેશી રહેવાસીઓ, જેમાં સરકારી અને ખાનગી ક્ષેત્રના કામદારો, વિદ્યાર્થીઓ, રોકાણકારો અને પરિવારના આશ્રિતોનો સમાવેશ થાય છે, તેમણે વાર્ષિક ૧૦૦ કુવૈતી દિનારની આરોગ્ય વીમા ફી ચૂકવવી પડશે. જોકે, કૃષિ કામદારો અને માછીમારો જેવા જૂથો માટે ફીમાં રાહત આપવામાં આવી છે.
પરિવાર અને મુલાકાતીઓ માટે નિયમો
ટૂંકા ગાળાના મુલાકાતીઓ, જેઓ બિઝનેસ અથવા ફેમિલી વિઝા પર કુવૈત આવે છે, તેમણે પણ ફરજિયાત વીમા પ્રણાલી હેઠળ આવવું પડશે. આવા પ્રવાસીઓ માટે વીમા ફી દર મહિને ૫ દિનાર નક્કી કરવામાં આવી છે. મહત્વની વાત એ છે કે વિઝા જારી કરતા પહેલા જ આ વીમો ખરીદવો અનિવાર્ય છે અને તેની મુદત પાસપોર્ટ નહીં પણ વિઝાની લંબાઈ પર આધારિત રહેશે.
આ લોકોને મળશે ખાસ મુક્તિ
કુવૈત સરકારે કેટલાક ચોક્કસ જૂથોને આ નિયમમાં મોટી રાહત આપી છે. કુવૈતી પરિવારો દ્વારા પ્રાયોજિત પ્રથમ ત્રણ ઘરેલુ સહાયકો (Domestic Workers) ને ફીમાંથી મુક્તિ અપાઈ છે. આ ઉપરાંત કુવૈતી નાગરિકોના વિદેશી જીવનસાથીઓ, બાળકો, રાજદ્વારી મિશનના સભ્યો અને નવજાત વિદેશી બાળકોને પણ ચોક્કસ સમયગાળા માટે આ નિયમોમાંથી છૂટ આપવામાં આવી છે.
શા માટે લેવાયો આ નિર્ણય?
કુવૈત સરકારના જણાવ્યા અનુસાર, આ પગલાનો મુખ્ય હેતુ વિદેશી નાગરિકોને તબીબી કટોકટી સમયે નાણાકીય સુરક્ષા પૂરી પાડવાનો છે. આનાથી સરકારી હોસ્પિટલો પરનું ભારણ ઘટશે અને ખાનગી વીમા કંપનીઓના સહયોગથી એક સક્ષમ હેલ્થકેર માળખું તૈયાર થશે.
જો તમે પણ કુવૈત જવાની તૈયારી કરી રહ્યા હોવ અથવા ત્યાં રહેતા હોવ, તો હવે તમારે તમારી વિઝા શ્રેણી મુજબ વીમા કવચની ખાતરી અગાઉથી જ કરી લેવી પડશે.