નવી દિલ્હી  : ભારત એક કૃષિપ્રધાન દેશ છે અને અહીં ખેડૂતને 'અન્નદાતા' અને 'માટીનો પુત્ર' ગણવામાં આવે છે. આજે ૨૩ ડિસેમ્બર એટલે કે 'રાષ્ટ્રીય ખેડૂત દિવસ'. આ દિવસ દેશના તે સાચા નાયકોને શ્રદ્ધાંજલિ આપવાનો છે જેઓ ધોમધખતા તાપ અને કકડતી ઠંડીમાં ખેતરોમાં પરસેવો પાડીને કરોડો દેશવાસીઓનું પેટ ભરે છે. આ દિવસ ભારતની અર્થવ્યવસ્થા, સંસ્કૃતિ અને ખાદ્ય સુરક્ષાના પાયા સમાન ખેડૂતોના સમર્પણને સલામ કરવાનો અવસર છે.
ચૌધરી ચરણ સિંહ: ખેડૂતોના મસીહા
૨૩ ડિસેમ્બરનો દિવસ એટલે ભારતના પાંચમા વડાપ્રધાન અને ખેડૂતોના હિત રક્ષક ગણાતા ચૌધરી ચરણ સિંહનો જન્મદિવસ. તેમનો જન્મ ૨૩ ડિસેમ્બર, ૧૯૦૨ના રોજ થયો હતો. ખેડૂતોના ઉત્થાન માટે તેમણે જે ક્રાંતિકારી કાર્યો કર્યા, તેના માનમાં વર્ષ ૨૦૦૧થી ભારત સરકારે આ દિવસને 'રાષ્ટ્રીય ખેડૂત દિવસ' તરીકે ઉજવવાનું નક્કી કર્યું હતું. તાજેતરમાં ૨૦૨૪માં ભારત સરકારે તેમને મરણોત્તર 'ભારત રત્ન'થી સન્માનિત કરી તેમની સેવાઓને બિરદાવી છે.
ખેડૂતોના સશક્તિકરણ માટે ક્રાંતિકારી નિર્ણયો
ચૌધરી ચરણ સિંહે માત્ર સૂત્રો જ નહોતા આપ્યા, પરંતુ ખેડૂતો માટે નક્કર કાયદા બનાવ્યા હતા. ૧૯૩૯ના દેવા મુક્તિ કાયદાથી લઈને ૧૯૫૩માં જમીનદારી પ્રથા નાબૂદ કરવા સુધીના તમામ મહત્વના કામોમાં તેમની મુખ્ય ભૂમિકા હતી. તેમણે ખેડૂતોને શાહુકારોના ચુંગાલમાંથી છોડાવ્યા અને ખેત પેદાશોના વેચાણ માટે બિલ રજૂ કર્યા. નાબાર્ડ (NABARD) ની સ્થાપના પાછળ પણ તેમનું જ વિઝન હતું, જે આજે ખેતીવાડી ક્ષેત્રે ધિરાણ આપતી દેશની સર્વોચ્ચ સંસ્થા છે.
કેવી રીતે ઉજવાય છે આ દિવસ?
આજના દિવસે દેશભરમાં કૃષિ મેળાઓ, સેમિનારો અને પ્રદર્શનો યોજવામાં આવે છે. ખેડૂતોને આધુનિક ટેકનોલોજી અને સરકારી યોજનાઓ વિશે માહિતગાર કરવામાં આવે છે. આ દિવસનો મુખ્ય હેતુ ખેડૂતોની સમસ્યાઓ પર ધ્યાન કેન્દ્રિત કરવાનો અને તેમને આર્થિક રીતે સશક્ત બનાવવાનો છે.
ખેડૂત દિવસ પર ખાસ સંદેશા:
•    "મારી વાર્તા માટીના ખોળામાં ઉગે છે, હું ખેડૂત છું અને પૃથ્વી મારી માતા છે!"
•    દેશના અસલી હીરો, અન્નદાતા ખેડૂત ભાઈ-બહેનોને રાષ્ટ્રીય ખેડૂત દિવસની હાર્દિક શુભેચ્છાઓ.
•    ખેડૂતની મહેનત દેશનું ગૌરવ છે, તેને સલામ!