નવી દિલ્હી  : ભારતની સૌથી પ્રતિષ્ઠિત અને અઘરી ગણાતી UPSC સિવિલ સર્વિસીસ પરીક્ષા પાસ કરવાનું સપનું દર વર્ષે લાખો યુવાનો જુએ છે, પરંતુ સફળતા માત્ર ગણ્યા-ગાંઠ્યા લોકોને જ મળે છે. જોકે, ભારતની કેટલીક એવી યુનિવર્સિટીઓ છે જેમના શૈક્ષણિક વાતાવરણ અને અભ્યાસના સ્તરને કારણે તેને 'UPSC ફેક્ટરી' તરીકે ઓળખવામાં આવે છે. આ યાદીમાં સૌથી મોટું અને મોખરે નામ એટલે દિલ્હી યુનિવર્સિટી (DU).
દિલ્હી યુનિવર્સિટી: સિવિલ સર્વિસીસનું ગઢ
દિલ્હી યુનિવર્સિટીએ દાયકાઓથી UPSC પર પોતાનું પ્રભુત્વ જાળવી રાખ્યું છે. એક આંકડા મુજબ ૧૯૭૫ થી ૨૦૧૪ સુધીમાં આ યુનિવર્સિટીમાંથી ૪,૦૦૦ થી વધુ વિદ્યાર્થીઓએ સિવિલ સર્વિસીસ પરીક્ષા પાસ કરી છે. સેન્ટ સ્ટીફન્સ, હિન્દુ કોલેજ, SRCC અને લેડી શ્રી રામ જેવી કોલેજોએ દેશને અસંખ્ય IAS-IPS અધિકારીઓ આપ્યા છે. ૨૦૧૪ના ટોપર ઈરા સિંઘલ, ૨૦૧૫ના ટીના ડાબી અને ૨૦૨૧ના શ્રુતિ શર્મા જેવી પ્રતિભાઓ DU ની જ દેન છે.
JNU અને IIT નો દબદબો
દિલ્હી યુનિવર્સિટી પછી બીજા ક્રમે જવાહરલાલ નેહરુ યુનિવર્સિટી (JNU) આવે છે. JNU ના શૈક્ષણિક વાતાવરણ અને ત્યાંની ચર્ચાઓ વિદ્યાર્થીઓની વિશ્લેષણાત્મક શક્તિ વધારે છે, જેના કારણે અત્યાર સુધીમાં ૧,૩૨૫ થી વધુ ઉમેદવારો અહીંથી UPSC પાસ કરી ચૂક્યા છે. તો બીજી તરફ, એન્જિનિયરિંગ પૃષ્ઠભૂમિ ધરાવતા વિદ્યાર્થીઓમાં IIT કાનપુર નો ક્રેઝ વધ્યો છે. ૨૦૨૩ ના ટોપર આદિત્ય શ્રીવાસ્તવ પણ IIT કાનપુરના વિદ્યાર્થી રહી ચૂક્યા છે.
કેમ આ યુનિવર્સિટીઓ છે ખાસ?
આ સંસ્થાઓમાં મળતું સ્પર્ધાત્મક વાતાવરણ, ઉત્તમ પુસ્તકાલય સુવિધાઓ અને અનુભવી ફેકલ્ટી વિદ્યાર્થીઓને UPSC ના લાંબા અને કઠિન પ્રવાસ માટે તૈયાર કરે છે. અહીં માત્ર પુસ્તકિયું જ્ઞાન જ નહીં, પરંતુ ઈન્ટરવ્યુમાં કામ લાગે તેવી પર્સનાલિટી ડેવલપમેન્ટ પર પણ ભાર મૂકવામાં આવે છે.
જો તમે પણ સનદી અધિકારી બનવાનું સપનું જોઈ રહ્યા હોવ, તો આ યુનિવર્સિટીઓમાં અભ્યાસ કરવો એ તમારી સફળતાના માર્ગને સરળ બનાવી શકે છે. જોકે, અંતે તો તમારી મહેનત, શિસ્ત અને સચોટ વ્યૂહરચના જ તમને IAS કે IPS ની ખુરશી સુધી પહોંચાડી શકે છે.