નવી દિલ્હી  : UPSC સિવિલ સર્વિસીસ પરીક્ષાને દેશની સૌથી કઠિન પરીક્ષા માનવામાં આવે છે, જ્યાં સફળતા મેળવવી એ લોઢાના ચણા ચાવવા સમાન છે. મોટાભાગના ઉમેદવારો એકાદ-બે નિષ્ફળતા બાદ હિંમત હારી જતા હોય છે, પરંતુ દિલ્હીની વંશિકા યાદવે સાબિત કરી દીધું છે કે જો મનમાં દૃઢ નિશ્ચય હોય તો નિષ્ફળતા એ માત્ર સફળતાનું એક પગથિયું બની રહે છે. પહેલા બે પ્રયાસમાં પ્રિલિમ્સ પણ પાસ ન કરી શકનારી વંશિકાએ ત્રીજા પ્રયાસમાં સીધો ઓલ ઇન્ડિયા રેન્ક 6 (AIR 6) મેળવીને ઈતિહાસ રચી દીધો છે.
એન્જિનિયરિંગથી IAS સુધીની રોમાંચક સફર
વંશિકા યાદવ મૂળ દિલ્હીની રહેવાસી છે. તેમણે દિલ્હી ટેકનોલોજીકલ યુનિવર્સિટી (DTU) માંથી એન્જિનિયરિંગની ડિગ્રી મેળવી હતી. અભ્યાસ પૂર્ણ થતા જ તેમને બેંગલુરુમાં 'સિસ્કો' જેવી દિગ્ગજ મલ્ટિનેશનલ કંપનીમાં ઉંચા પગારની નોકરી મળી ગઈ હતી. કારકિર્દી સ્થિર હતી અને પગાર પણ શાનદાર હતો, પરંતુ વંશિકાના મનમાં દેશસેવાનો જુસ્સો હતો. તેમને લાગ્યું કે જો અત્યારે સપનું પૂરું કરવા જોખમ નહીં લે તો જીવનભર પસ્તાવો થશે, અને આખરે તેમણે લાખોની નોકરીને લાત મારી UPSCની તૈયારી શરૂ કરી.
જ્યારે નસીબે સાથ ન આપ્યો પણ હિંમત ન હારી
વંશિકા માટે શરૂઆતનો પ્રવાસ અત્યંત કપરો રહ્યો. પહેલા અને બીજા પ્રયાસમાં તેઓ પ્રિલિમ પરીક્ષાની સીમા પણ ઓળંગી શક્યા નહીં. કોઈપણ માટે આ સ્થિતિ આત્મવિશ્વાસ ડગાવનારી હોય છે, પણ વંશિકાએ હાર માનવાને બદલે પોતાની વ્યૂહરચના બદલી. તેમણે પોતાની નબળાઈઓ શોધી, વધુ શિસ્તબદ્ધ રીતે વાંચન શરૂ કર્યું અને ત્રીજી વખત પૂરી તાકાત સાથે મેદાનમાં ઉતર્યા.
ત્રીજા પ્રયાસે મેળવ્યું સર્વોચ્ચ શિખર
વંશિકાની વર્ષોની તપસ્યાનું ફળ ૨૦૧૯ની UPSC પરીક્ષામાં મળ્યું. તેમણે ૨૦૨૫ માંથી ૧૦૪૬ ગુણ મેળવીને સમગ્ર દેશમાં છઠ્ઠો ક્રમ હાંસલ કર્યો. તેમની આ સફળતા એવા લાખો યુવાનો માટે ઉદાહરણ છે જેઓ નિષ્ફળતાથી ડરીને પોતાના સપના છોડી દે છે.
પરિવાર બન્યો સૌથી મોટી શક્તિ
વંશિકાની આ સફળતામાં તેમના પિતા રાજકુમાર યાદવ (જે પોતે પોલીસમાં ASI છે) અને માતા સરિતા યાદવનો મોટો હાથ રહ્યો છે. મધ્યમવર્ગીય પરિવારે તેમની દીકરી પર ભરોસો રાખ્યો અને મુશ્કેલ સમયમાં ઢાલ બનીને ઉભા રહ્યા. આજે વંશિકા યાદવ એક IAS અધિકારી તરીકે દેશની સેવા કરી રહ્યા છે અને લાખો વિદ્યાર્થીઓ માટે પ્રેરણાસ્ત્રોત બન્યા છે.