ગાઝીપુર : ઉત્તર પ્રદેશના ગાઝીપુરમાં રાજકીય પારો ગરમાયો છે. ભાજપના રાજ્યસભા સાંસદ ડૉ. સંગીતા બળવંતે કોંગ્રેસ નેતા પ્રિયંકા ગાંધી અને રાહુલ ગાંધી પર આકરા પ્રહારો કર્યા છે. પ્રિયંકા ગાંધીને વડાપ્રધાન બનાવવાની કોંગ્રેસી નેતાઓની વધતી જતી માંગના જવાબમાં સાંસદે સ્પષ્ટ શબ્દોમાં કહી દીધું કે, વિપક્ષના નેતાઓ 'મુંગેરી લાલના હસીન સપના' જોઈ રહ્યા છે, કારણ કે જ્યાં સુધી વડાપ્રધાન નરેન્દ્ર મોદી છે ત્યાં સુધી પીએમની ખુરશી ખાલી નથી.
રમતગમત સ્પર્ધામાં ફૂટ્યો રાજકીય બોમ્બ
મંગળવારે ગાઝીપુર ખાતે આયોજિત 'સાંસદ રમતગમત સ્પર્ધા'નું ઉદ્ઘાટન કરવા પહોંચેલા ડૉ. સંગીતા બળવંતે મીડિયા સાથેની વાતચીતમાં કોંગ્રેસ પર આકરા કટાક્ષ કર્યા હતા. તેમણે કહ્યું કે, "રાહુલ ગાંધી અને પ્રિયંકા ગાંધી વડાપ્રધાન બનવાનું જે સ્વપ્ન જુએ છે તે માત્ર કલ્પના છે. કોંગ્રેસના નેતા ઇમરાન મસૂદ ભલે પ્રિયંકાને પીએમ પદના ઉમેદવાર ગણાવે, પણ જનતા જાણે છે કે દેશની કમાન કોના હાથમાં સુરક્ષિત છે."
ગાઝા પર બોલ્યા પણ બાંગ્લાદેશ પર કેમ મૌન?
ભાજપ સાંસદે પ્રિયંકા ગાંધીની નીતિઓ પર સવાલ ઉઠાવતા વધુમાં ઉમેર્યું હતું કે, "પ્રિયંકા ગાંધી ગાઝાના મુદ્દા પર તો ખૂબ બોલે છે, પરંતુ પડોશી દેશ બાંગ્લાદેશમાં હિન્દુઓ પર થઈ રહેલા નરસંહાર અને અત્યાચાર પર કેમ મૌન છે? તેમની ભાષા અને મુદ્દાઓ આપણા દુશ્મન દેશોને અનુકૂળ હોય તેવા લાગે છે." તેમણે આરોપ લગાવ્યો કે કોંગ્રેસ પાસે હવે કોઈ નક્કર મુદ્દા રહ્યા નથી, તેથી તેઓ માત્ર પાયાવિહોણી વાતો કરી રહ્યા છે.
ગ્રામીણ પ્રતિભા માટે વડાપ્રધાનનો આભાર
રાજકીય પ્રહારો વચ્ચે સાંસદે રમતગમત મહોત્સવના મહત્વ વિશે પણ વાત કરી હતી. તેમણે જણાવ્યું કે વડાપ્રધાન મોદીની પહેલથી ગ્રામીણ વિસ્તારોમાં છુપાયેલી રમતગમતની પ્રતિભાને એક મોટું પ્લેટફોર્મ મળી રહ્યું છે. ત્રણ દિવસ સુધી ચાલનારી આ સ્પર્ધામાં ખેલાડીઓ ભારે ઉત્સાહ સાથે ભાગ લઈ રહ્યા છે. સંગીતા બળવંતના આ આકરા નિવેદનો બાદ હવે કોંગ્રેસ છાવણીમાં કેવા પડઘા પડે છે તે જોવું રહ્યું.