ઢાકા:બાંગ્લાદેશમાં સત્તા પરિવર્તન બાદ સર્જાયેલી અરાજકતા હવે માત્ર આંતરિક મુદ્દો ન રહેતા વૈશ્વિક રાજદ્વારી જંગનું મેદાન બની ગઈ છે. રશિયા અને બ્રિટનની આકરી પ્રતિક્રિયા બાદ હવે ફ્રાન્સ અને જર્મનીએ પણ મેદાનમાં ઉતરીને મોહમ્મદ યુનુસની વચગાળાની સરકારને કડક શબ્દોમાં સંભળાવ્યું છે. ફ્રાન્સના રાજદૂત અને જર્મનીના પ્રતિનિધિએ તાજેતરમાં 'ધ ડેઇલી સ્ટાર' ઓફિસની મુલાકાત લઈને તોફાની તત્વો દ્વારા કરવામાં આવેલી તોડફોડ અને આગજનીનું નિરીક્ષણ કર્યું હતું. આ મુલાકાત એ માત્ર સહાનુભૂતિ નહોતી, પરંતુ ઢાકાને એક સીધો અને મજબૂત સંદેશ હતો કે જો પ્રેસની સ્વતંત્રતા અને પત્રકારોની સુરક્ષા સુનિશ્ચિત કરવામાં નહીં આવે, તો બાંગ્લાદેશ આંતરરાષ્ટ્રીય સ્તરે અલગ-થલગ પડી જશે.

બીજી તરફ, ભારતના જૂના અને ભરોસાપાત્ર મિત્ર એવા રશિયાએ આ મામલે અત્યંત આક્રમક વલણ અપનાવ્યું છે. રશિયન રાજદૂત એલેક્ઝાન્ડર ગ્રિગોરીવિચ ખોઝિને યુનુસ સરકારને ૧૯૭૧ના ઇતિહાસની યાદ અપાવતા સ્પષ્ટ કર્યું છે કે ભારત સાથેના સંબંધોમાં તિરાડ પાડવી એ સમગ્ર દક્ષિણ એશિયાની સ્થિરતા માટે જોખમી છે. રશિયાએ ચેતવણી આપી છે કે જે દેશના નિર્માણમાં ભારત અને રશિયાએ લોહી રેડ્યું છે, તેને ભારત વિરોધી એજન્ડાનું કેન્દ્ર બનવા દેવામાં આવશે નહીં. રશિયાની આ સલાહ એ સંકેત છે કે બાંગ્લાદેશે પશ્ચિમી દેશોના દબાણ અને ભારતના હિતો વચ્ચે સંતુલન જાળવવું પડશે, અન્યથા તેને મોટી રાજદ્વારી કિંમત ચૂકવવી પડી શકે છે.

હાલમાં બાંગ્લાદેશની વચગાળાની સરકાર ચારે બાજુથી ઘેરાયેલી જોવા મળી રહી છે. એકબાજુ કટ્ટરપંથીઓ દ્વારા લઘુમતી હિન્દુઓ પર કરવામાં આવતી હિંસા અટકાવવાનું દબાણ છે, તો બીજીબાજુ અમેરિકા, યુરોપ અને રશિયા જેવી મહાસત્તાઓના અલગ-અલગ હિતોને સાચવવાનું પડકારજનક કાર્ય છે. જો યુનુસ સરકાર લોકશાહી મૂલ્યોને પુનઃસ્થાપિત કરવામાં નિષ્ફળ જશે, તો ફ્રાન્સ અને જર્મની જેવા દેશો આર્થિક સહાય અને વેપાર છૂટછાટો પર કાતર ફેરવી શકે છે. વિશ્વના દેશોની આ 'વોચફુલ' નજર દર્શાવે છે કે હવે માત્ર નિવેદનોથી કામ નહીં ચાલે; બાંગ્લાદેશે મેદાન પર કડક કાર્યવાહી કરીને પોતાની વિશ્વસનીયતા સાબિત કરવી પડશે.