પેરિસ:  યુરોપની અગ્રણી સત્તા ગણાતું ફ્રાન્સ અત્યારે ભયાનક રાજકીય અસ્થિરતાના ઉંબરે આવીને ઊભું છે. ૨૦૨૬ના બજેટ માટેની વાટાઘાટો પડી ભાંગતા હવે ફ્રાન્સ પર પણ અમેરિકા જેવું 'સરકારી શટડાઉન' આવવાનું જોખમ તોળાઈ રહ્યું છે. જો નવા વર્ષ પહેલા બજેટ પસાર ન થાય તો જાહેર સેવાઓ, પોલીસ, આરોગ્ય અને શિક્ષણ જેવી પાયાની જરૂરિયાતો માટે ભંડોળ અટકી શકે છે. આ ગંભીર સ્થિતિને ટાળવા માટે રાષ્ટ્રપતિ મેક્રોનની લઘુમતી સરકારે સંસદમાં એક 'કટોકટી બિલ' રજૂ કર્યું છે. આ બિલનો હેતુ ૨૦૨૫ના જૂના બજેટના આધારે જ કામચલાઉ ધોરણે વહીવટ ચલાવવાનો છે, જેથી દેશમાં સંપૂર્ણ અંધાધૂંધી ન ફેલાય.

નેશનલ એસેમ્બલી અત્યારે રણમેદાન બની ગઈ છે, જ્યાં ત્રણ વિરોધી વિચારધારાઓ - મેક્રોનનું જૂથ, મરીન લે પેનની જમણેરી પાંખ અને ડાબેરી ગઠબંધન - એકબીજા સામે આમને-સામને છે. વિપક્ષનો આરોપ છે કે મેક્રોન સરકાર સામાન્ય જનતા પર કરનો બોજ વધારી રહી છે. આ દબાણ હેઠળ સરકારને પોતાના વિવાદાસ્પદ પેન્શન સુધારા, જે નિવૃત્તિ વય ૬૨થી વધારીને ૬૪ કરવાની જોગવાઈ ધરાવે છે, તેને હાલ પૂરતા મુલતવી રાખવાની ફરજ પડી છે. નાણામંત્રી રોલેન્ડ લેસ્ક્યુરે ચેતવણી આપી છે કે આ કટોકટી જેટલી લાંબી ખેંચાશે, ફ્રાન્સના અર્થતંત્ર પર રોકાણકારોનો ભરોસો તેટલો જ ઓછો થશે.

ફ્રાન્સ માટે સૌથી મોટો પડકાર તેની વધતી જતી બજેટ ખાધ છે, જેને ૫ ટકા સુધી નીચે લાવવાનું લક્ષ્ય રાખવામાં આવ્યું છે. આરોગ્ય અને સામાજિક કલ્યાણ પર થતો અઢળક ખર્ચ અને તેની સામે ઘટતી આવક વચ્ચે સંતુલન જાળવવું એ વડાપ્રધાન સેબેસ્ટિયન લેકોર્નુ માટે લોઢાના ચણા ચાવવા સમાન છે. મંગળવારે રાત્રે થનારું મતદાન મેક્રોન સરકાર માટે 'લિટમસ ટેસ્ટ' સાબિત થશે. જો આ બિલ પસાર નહીં થાય, તો પેરિસના રસ્તાઓ પર ફરી એકવાર જનતાનો રોષ ફાટી નીકળી શકે છે અને સમગ્ર યુરોપિયન યુનિયનના અર્થતંત્ર પર તેની માઠી અસર જોવા મળી શકે છે.