મુંબઈ: આદિત્ય ધારની બહુચર્ચિત ફિલ્મ 'ધુરંધર' અત્યારે માત્ર બોક્સ ઓફિસ પર જ નહીં, પણ સોશિયલ મીડિયા પર પણ ચર્ચાનું કેન્દ્ર બની છે. એક તરફ ફિલ્મ કમાણીના નવા રેકોર્ડ સર્જી રહી છે, તો બીજી તરફ પ્રખ્યાત યુટ્યુબર ધ્રુવ રાઠીએ આ ફિલ્મને 'પ્રોપેગન્ડા' ગણાવીને તેની આકરી ટીકા કરી છે. હવે આ વિવાદમાં ફિલ્મમાં વિલન 'ડોંગા' ની ભૂમિકા ભજવનાર કલાકાર નવીન કૌશિકે મૌન તોડીને ધ્રુવ રાઠીને આકરો અને રમૂજી જવાબ આપ્યો છે.
નવીન કૌશિકને જ્યારે ધ્રુવ રાઠીના વિરોધ વિશે પૂછવામાં આવ્યું, ત્યારે તેમણે ખૂબ જ હળવા અંદાજમાં કહ્યું, "દરેક વ્યક્તિને પોતાનો અભિપ્રાય રાખવાનો અધિકાર છે. ધ્રુવ રાઠીએ જે વીડિયો બનાવ્યો તેને ૧૫ મિલિયનથી વધુ વ્યૂઝ મળ્યા છે. પરિણામ એ આવ્યું કે જે લોકો ફિલ્મ જોવાના નહોતા, તેઓ પણ હવે ઉત્સુકતાથી થિયેટરોમાં જઈ રહ્યા છે. હકીકતમાં, ધ્રુવના વીડિયો પછી અમારા દર્શકોમાં જંગી વધારો થયો છે!"
નવીન કૌશિકે કટાક્ષ કરતા આગળ કહ્યું, "જો ફિલ્મને ફાયદો થતો હોય, તો પ્રચાર સારો હોય કે ખરાબ, તેનાથી શું ફરક પડે છે? ધ્રુવ રાઠીએ અજાણતામાં અમારું જે મફત પ્રમોશન કરી આપ્યું છે, તે માટે હું તેમનું સ્વાગત કરું છું. તેમની ટીકાથી ફિલ્મને વધુ લોકો સુધી પહોંચવામાં ચોક્કસપણે મદદ મળી છે."
તમને જણાવી દઈએ કે, 'ઉરી' ફેમ ડિરેક્ટર આદિત્ય ધારની આ ફિલ્મ ભારત અને વિદેશોમાં પણ ખૂબ સારું પ્રદર્શન કરી રહી છે. ફિલ્મના વિષયવસ્તુને લઈને સોશિયલ મીડિયા પર બે જૂથો પડી ગયા છે. એક પક્ષ તેને રાષ્ટ્રભક્તિથી ભરપૂર ફિલ્મ ગણાવે છે, જ્યારે બીજો પક્ષ તેને એજન્ડા આધારિત ફિલ્મ કહી રહ્યો છે. જોકે, આ વિવાદ વચ્ચે ફિલ્મની કમાણીનો આંકડો સતત વધી રહ્યો છે, જે દર્શાવે છે કે પ્રેક્ષકોને આ એક્શન પેક્ડ ડ્રામા પસંદ પડી રહ્યો છે.