નવી દિલ્હી  : ભારતના વિજ્ઞાન અને ટેકનોલોજીના ક્ષેત્રમાં અસાધારણ યોગદાન આપનારા પ્રતિભાઓ માટે આજનો દિવસ સુવર્ણ અક્ષરે લખાય તેવો રહ્યો. નવી દિલ્હીમાં રાષ્ટ્રપતિ ભવનના દરબાર હોલ ખાતે આયોજિત એક ગરિમાપૂર્ણ સમારોહમાં રાષ્ટ્રપતિ દ્રૌપદી મુર્મુએ 'રાષ્ટ્રીય વિજ્ઞાન પુરસ્કાર 2025' એનાયત કર્યા હતા. વિજ્ઞાન અને નવીનતા (Innovation) ના ક્ષેત્રમાં આ દેશનું સર્વોચ્ચ સન્માન ગણાય છે.
પ્રો. જયંત નારલીકરને સર્વોચ્ચ 'વિજ્ઞાન રત્ન'
આ વર્ષનો સૌથી પ્રતિષ્ઠિત 'વિજ્ઞાન રત્ન' પુરસ્કાર પદ્મ વિભૂષણ પ્રો. જયંત વિષ્ણુ નારલીકરને મરણોત્તર એનાયત કરવામાં આવ્યો છે. ખગોળશાસ્ત્ર અને કોસ્મોલોજીમાં તેમના અતુલ્ય પ્રદાનને ભારતે આ રીતે આદરપૂર્વક નમન કર્યા છે. આ ઉપરાંત, વિજ્ઞાનના વિવિધ ક્ષેત્રોમાં ઉત્કૃષ્ટ કાર્ય કરનારા આઠ વૈજ્ઞાનિકોને 'વિજ્ઞાન શ્રી' પુરસ્કારથી નવાજવામાં આવ્યા હતા.
યુવા શક્તિ અને ટીમ વર્કનું ગૌરવ
દેશના ભવિષ્ય એવા ૧૪ તેજસ્વી યુવા વૈજ્ઞાનિકોને 'વિજ્ઞાન યુવા-શાંતિ સ્વરૂપ ભટનાગર' પુરસ્કાર આપી પ્રોત્સાહિત કરવામાં આવ્યા હતા. સંયુક્ત પ્રયાસોને બિરદાવવા માટે આપવામાં આવતો 'વિજ્ઞાન ટીમ' પુરસ્કાર આ વખતે 'ટીમ એરોમા મિશન-CSIR'ને મળ્યો છે, જેણે કૃષિ અને અરોમેટિક પ્લાન્ટ્સના ક્ષેત્રમાં ક્રાંતિ લાવી છે.
નવીનતા અને આત્મનિર્ભરતા પર ભાર
આ પુરસ્કારોની સ્થાપના પાછળનો મુખ્ય ઉદ્દેશ્ય એવા વૈજ્ઞાનિકો અને ટેક્નોલોજિસ્ટ્સને સન્માનિત કરવાનો છે જેમણે ભારતને ટેકનોલોજી-આધારિત નવીનતાઓમાં અગ્રેસર બનાવ્યું છે. રાષ્ટ્રપતિએ વિજેતાઓને અભિનંદન આપતા જણાવ્યું હતું કે, આ વૈજ્ઞાનિકોનું પ્રેરણાદાયી યોગદાન આવનારી પેઢીઓ માટે માર્ગદર્શક બનશે અને ભારતને 'વિકસિત ભારત' બનાવવાના સંકલ્પને વેગ આપશે.