રાયપુર : ભારતના ચૂંટણી પંચ દ્વારા છત્તીસગઢમાં મતદાર યાદીને પારદર્શક અને સચોટ બનાવવા માટે હાથ ધરવામાં આવેલી ‘સ્પેશિયલ ઇન્ટેન્સિવ રિવિઝન’ (SIR) કવાયતના પરિણામો સામે આવ્યા છે. રાજ્યના મુખ્ય ચૂંટણી અધિકારી યશવંત કુમારે આજે ડ્રાફ્ટ મતદાર યાદી પ્રકાશિત કરતા જણાવ્યું હતું કે, આ ઝુંબેશ હેઠળ રાજ્યભરના ૧ કરોડ ૮૪ લાખ ૯૫ હજાર ૯૨૦ મતદારો પાસેથી વેરિફિકેશન ફોર્મ પ્રાપ્ત થયા છે. આ પ્રક્રિયાનો મુખ્ય હેતુ યાદીમાં રહેલી ક્ષતિઓ દૂર કરવાનો છે.
યાદીમાંથી હજારો ‘ઘોસ્ટ વોટર્સ’ બહાર
ચૂંટણી પંચની આ કડક તપાસમાં ચોંકાવનારા આંકડા સામે આવ્યા છે. તપાસ દરમિયાન જાણવા મળ્યું છે કે ૬,૪૨,૨૩૪ મતદારોના અવસાન થઈ ચૂક્યા છે, છતાં તેમના નામ યાદીમાં હતા. આ ઉપરાંત ૧૯,૧૩,૫૪૦ મતદારો એવા મળ્યા છે જેઓ કાં તો સ્થળાંતર કરી ગયા છે અથવા લાંબા સમયથી ગેરહાજર છે. એટલું જ નહીં, ૧,૭૯,૪૩૩ મતદારો એવા પણ ઝડપાયા છે જેમના નામ એક કરતાં વધુ જગ્યાએ નોંધાયેલા હતા. અગાઉ છત્તીસગઢમાં કુલ ૨,૧૨,૩૦,૭૩૭ મતદારો નોંધાયેલા હતા, જેમાં હવે મોટો ફેરફાર જોવા મળશે.
વાંધા અને સુધારા માટેની સમયમર્યાદા
મુખ્ય ચૂંટણી અધિકારીએ સ્પષ્ટ કર્યું છે કે આજથી ૨૨ જાન્યુઆરી સુધી મતદારો ડ્રાફ્ટ યાદી સામે પોતાના દાવા કે વાંધા રજૂ કરી શકશે. ૧૪ જાન્યુઆરી સુધી આ વાંધાઓની સુનાવણી અને ચકાસણી કરવામાં આવશે. તમામ પ્રક્રિયા પૂર્ણ થયા બાદ ૨૧ ફેબ્રુઆરીએ આખરી અને અંતિમ મતદાર યાદી પ્રસિદ્ધ કરવામાં આવશે.
નામ ન હોય તો ગભરાશો નહીં
યશવંત કુમારે રાજ્યના નાગરિકોને અપીલ કરી છે કે તેઓ ડ્રાફ્ટ યાદીમાં પોતાનું નામ ચોક્કસ તપાસી લે. જો કોઈનું નામ યાદીમાં ન હોય અથવા વિસંગતતા હોય, તો નિર્ધારિત સમયમાં અરજી કરી શકાય છે. તેમણે ખાતરી આપી હતી કે જે લાયક મતદારોના નામ હાલમાં નથી, તેમને ગભરાવાની જરૂર નથી કારણ કે નામ ઉમેરવાની પ્રક્રિયા ભવિષ્યમાં પણ સતત ચાલુ રહેશે.