નોમ પેન્હ  : થાઈલેન્ડ અને કંબોડિયા વચ્ચે ચાલી રહેલો સરહદી વિવાદ હવે ભયાનક વળાંક લઈ રહ્યો છે. છેલ્લા ૧૭ દિવસથી સતત ચાલતા આ સંઘર્ષમાં અત્યાર સુધીમાં ૨૧ કંબોડિયન નાગરિકોએ પોતાના જીવ ગુમાવ્યા છે. કંબોડિયન સંરક્ષણ પ્રવક્તા લેફ્ટનન્ટ જનરલ માલી સોચેતાએ ગંભીર આક્ષેપ કર્યો છે કે, થાઈ લશ્કરી દળો કંબોડિયાના રહેણાંક વિસ્તારોને નિશાન બનાવીને ભારે તોપખાના અને ટેન્ક-માઉન્ટેડ મશીનગનથી અંધાધૂંધ ગોળીબાર કરી રહ્યા છે.
ભયના ઓથાર હેઠળ લાખો લોકોનું પલાયન
૭ ડિસેમ્બરથી શરૂ થયેલા આ લોહિયાળ સંઘર્ષે માનવીય કટોકટી સર્જી છે. કંબોડિયન ગૃહ મંત્રાલયના તાજેતરના અહેવાલ મુજબ, સરહદી વિસ્તારોમાં રહેતા અંદાજે ૫,૪૫,૦૦૦ નાગરિકોને પોતાના ઘરબાર છોડીને જીવ બચાવવા સુરક્ષિત આશ્રયસ્થાનોમાં આશરો લેવાની ફરજ પડી છે. બંને દેશો એકબીજા પર હુમલાની શરૂઆત કરવાના આક્ષેપો લગાવી રહ્યા છે, જેના કારણે સ્થિતિ વધુ જટિલ બની છે.
શાંતિ માટે ‘એશિયાન’ મેદાનમાં
પરિસ્થિતિની ગંભીરતાને ધ્યાનમાં લેતા, દક્ષિણ-પૂર્વ એશિયન રાષ્ટ્રોના સંગઠન (ASEAN) ના સભ્ય દેશોના વિદેશ મંત્રીઓએ મલેશિયાના કુઆલાલંપુરમાં એક ખાસ બેઠક યોજી હતી. આ બેઠકમાં તમામ સભ્ય દેશોએ બંને પાડોશી દેશોને તાત્કાલિક અસરથી દુશ્મનાવટ બંધ કરવા અને સંયમ રાખવા વિનંતી કરી છે. એશિયાન નેતાઓએ સ્પષ્ટ કર્યું છે કે પ્રાદેશિક શાંતિ અને સુરક્ષા જાળવવા માટે સંવાદ જ એકમાત્ર રસ્તો છે.
પ્રાદેશિક સ્થિરતા સામે જોખમ
એશિયાન ચાર્ટર અનુસાર, આ બેઠકમાં પ્રાદેશિક શાંતિ અને સમૃદ્ધિ સુનિશ્ચિત કરવા માટે સંગઠનની એકતા અને કેન્દ્રીયતા પ્રત્યેની પ્રતિબદ્ધતા ફરીથી દોહરાવવામાં આવી હતી. વિશ્વભરના દેશોની નજર અત્યારે આ વિવાદ પર ટકેલી છે, કારણ કે જો આ સંઘર્ષ જલ્દી ન અટક્યો તો તે સમગ્ર દક્ષિણ-પૂર્વ એશિયાની સ્થિરતાને જોખમમાં મૂકી શકે છે.