નવી દિલ્હી  : હિન્દી સાહિત્યના શિખર સમાન લેખક અને જ્ઞાનપીઠ પુરસ્કાર વિજેતા વિનોદ કુમાર શુક્લાના અવસાનથી સમગ્ર દેશમાં શોકની લહેર છે. સાહિત્ય જગતની આ અપાર ખોટ પર પ્રધાનમંત્રી નરેન્દ્ર મોદીએ ઊંડા દુઃખની લાગણી વ્યક્ત કરી છે. પીએમ મોદીએ દિવંગત લેખકને યાદ કરતા સાહિત્ય ક્ષેત્રે તેમની અવિસ્મરણીય સેવાઓને બિરદાવી હતી.
અમૂલ્ય યોગદાનને પીએમએ કર્યું યાદ
વડાપ્રધાન મોદીએ એક સોશિયલ મીડિયા પોસ્ટ દ્વારા વિનોદ કુમાર શુક્લાને શ્રદ્ધાંજલિ આપતા જણાવ્યું હતું કે, "પ્રખ્યાત લેખક વિનોદ કુમાર શુક્લાજીના નિધનના સમાચાર અત્યંત દુઃખદ છે. હિન્દી સાહિત્યની દુનિયામાં તેમના અમૂલ્ય અને મૌલિક યોગદાન માટે તેમને હંમેશા આદરપૂર્વક યાદ કરવામાં આવશે. તેમની લેખનશૈલી અને વિચારોએ લાખો વાચકોને પ્રભાવિત કર્યા છે."
પરિવાર પ્રત્યે વ્યક્ત કરી સંવેદના
વધુમાં, પ્રધાનમંત્રીએ શોકતુર પરિવાર અને શુક્લાજીના વિશાળ પ્રશંસક વર્ગ પ્રત્યે પોતાની સંવેદના વ્યક્ત કરી હતી. તેમણે કહ્યું કે આ મુશ્કેલ સમયમાં ઈશ્વર તેમના પરિવારને શક્તિ આપે તેવી પ્રાર્થના છે. વિનોદ કુમાર શુક્લાની વિદાય માત્ર એક વ્યક્તિની વિદાય નથી, પરંતુ એક આખેઆખા સાહિત્યિક યુગનો અંત છે, જેની ખોટ લાંબા સમય સુધી વર્તાશે.
સાહિત્ય જગતમાં શોકનો માહોલ
ઉલ્લેખનીય છે કે ૮૮ વર્ષની વયે રાયપુર ખાતે અંતિમ શ્વાસ લેનાર વિનોદ કુમાર શુક્લાએ પોતાની નવલકથાઓ અને કવિતાઓ દ્વારા સામાન્ય માનવીની સંવેદનાઓને વાચા આપી હતી. પીએમ મોદીની આ શ્રદ્ધાંજલિ દર્શાવે છે કે વિનોદજીએ પોતાની કલમ દ્વારા રાષ્ટ્રીય સ્તરે કેટલી ઊંડી છાપ છોડી છે.