બ્રસેલ્સ : યુક્રેન અને રશિયા વચ્ચે ચાલી રહેલું યુદ્ધ હવે જમીન અને આકાશ છોડીને છેક અંતરિક્ષ (Space) સુધી પહોંચી ગયું હોય તેવું લાગે છે. નાટો દેશોની ગુપ્તચર એજન્સીઓના રિપોર્ટ અનુસાર, રશિયા એલોન મસ્કની કંપની ‘સ્ટારલિંક’ના ઉપગ્રહોને તોડી પાડવા માટે એક ભયાનક ‘ઝોન-ઇફેક્ટ’ હથિયાર વિકસાવી રહ્યું છે. આ સમાચાર બહાર આવતા જ વૈશ્વિક સ્તરે ગભરાટ ફેલાયો છે.
શું છે આ ‘શ્રાપનલ ક્લાઉડ’ હથિયાર?
અહેવાલો મુજબ, રશિયા અવકાશમાં એક એવું શસ્ત્ર લોન્ચ કરવાની યોજના બનાવી રહ્યું છે જે હજારો નાના ધાતુના ટુકડાઓ અને કણોને અવકાશમાં છોડશે. આ કણો એક ‘વિનાશક વાદળ’ની જેમ કામ કરશે, જે સ્ટારલિંક જેવા નાના ઉપગ્રહો સાથે અથડાઈને તેમને પળવારમાં નકામા બનાવી દેશે. યુક્રેનની સેના હાલમાં સંદેશાવ્યવહાર અને ડ્રોન ઓપરેશન માટે સ્ટારલિંક ઈન્ટરનેટ પર નિર્ભર છે, જેને તોડવા માટે રશિયા આ ખતરનાક ચાલ ચાલી રહ્યું છે.
આખી દુનિયા માટે ખતરો
અવકાશ સુરક્ષા નિષ્ણાતોનું કહેવું છે કે જો રશિયા આવો હુમલો કરે છે, તો તે માત્ર સ્ટારલિંક જ નહીં પણ અન્ય દેશોના અને રશિયાના પોતાના ઉપગ્રહો માટે પણ આત્મઘાતી સાબિત થઈ શકે છે. અવકાશમાં ફેલાયેલો આ કાટમાળ (Space Debris) પૃથ્વીની આસપાસના રસ્તાને એટલો જોખમી બનાવી દેશે કે ભવિષ્યમાં કોઈપણ સેટેલાઈટ લોન્ચ કરવો અશક્ય બની શકે છે. સિક્યોર વર્લ્ડ ફાઉન્ડેશનના નિષ્ણાતોએ ચેતવણી આપી છે કે આનાથી અવકાશમાં એક મોટું સંકટ ઊભું થશે.
રશિયાનો ઈનકાર અને પશ્ચિમી દેશોનો આક્ષેપ
જોકે, રશિયન રાષ્ટ્રપતિ વ્લાદિમીર પુતિને અગાઉ સ્પષ્ટ કર્યું છે કે તેઓ અવકાશમાં પરમાણુ શસ્ત્રો તૈનાત કરવાના વિરોધમાં છે. પરંતુ ફ્રેન્ચ મિલિટરી સ્પેસ કમાન્ડે રશિયાની ગતિવિધિઓને ‘બેજવાબદાર’ ગણાવી છે. અમેરિકાએ પણ અગાઉ રશિયા પર એન્ટી-સેટેલાઈટ ટેકનોલોજીના પરીક્ષણના આરોપો લગાવ્યા છે. જો આ ‘ધાતુના વાદળ’ જેવું હથિયાર હકીકતમાં વાપરવામાં આવે, તો તે માનવ ઈતિહાસમાં અવકાશના ઉપયોગ પર કાયમી રોક લગાવી શકે છે.