નવી દિલ્હી,તા.૨૫: થોડા દિવસો પહેલા, થાઇ સેનાએ કંબોડિયા સાથેના વિવાદિત સરહદી વિસ્તારમાં ભગવાન વિષ્ણુની પ્રતિમા તોડી પાડી હતી. બુલડોઝરનો ઉપયોગ કરીને આ પ્રતિમા તોડી પાડવામાં આવી હતી. આ વીડિઓ સોશિયલ મીડિયા પર વાયરલ થયો હતો, જેના કારણે વ્યાપક ટીકા થઈ હતી. ભારતીય વિદેશ મંત્રાલયે હવે એક સત્તાવાર નિવેદન જારી કર્યું છે. તોડી પાડવાના અહેવાલો પર ભારતે કડક વલણ અપનાવ્યું છે.

વિદેશ મંત્રાલયે આ ઘટનાને દુર્ભાગ્યપૂર્ણ ગણાવી છે. આવા કૃત્યો માત્ર ધાર્મિક લાગણીઓને જ નહીં પરંતુ સંસ્કૃતિને પણ નુકસાન પહોંચાડે છે, જે આપણા સહિયારા સાંસ્કૃતિક વારસાનો ભાગ છે. વિદેશ મંત્રાલયના પ્રવકતા રણધીર જયસ્વાલે કહ્યું, અમે વિવાદિત સરહદી વિસ્તારમાં સ્થિત એક હિન્દુ દેવતાની તાજેતરમાં બનાવેલી પ્રતિમાની તોડફોડ અંગેના અહેવાલો જોયા છે. હિન્દુ અને બૌદ્ધ દેવતાઓ સમગ્ર દક્ષિણપૂર્વ એશિયાઈ ક્ષેત્રમાં ખૂબ જ પૂજનીય છે અને આપણા સહિયારા સાંસ્કૃતિક વારસાનો ભાગ છે.

તેમણે ભારપૂર્વક જણાવ્યું હતું કે આવા અપમાનજનક કૃત્યો અયોગ્ય છે, ભલે તે પ્રાદેશિક દાવાઓ ગમે તે હોય. આ માત્ર ધાર્મિક લાગણીઓને જ નહીં પરંતુ વિશ્વભરમાં તેમના અનુયાયીઓના હૃદયને પણ ઠેસ પહોંચાડે છે. આવી ઘટનાઓ સામાજિક સંવાદિતા અને સાંસ્કૃતિક સંબંધોને નબળી પાડે છે. રણધીર જયસ્વાલે બંને પક્ષોને શાંતિ પુનઃસ્થાપિત કરવા માટે વાતચીત અને રાજદ્વારી ફરી શરૂ કરવા વિનંતી કરી. તેમણે કહ્યું કે તમામ પક્ષો જાનમાલના નુકસાન અને સાંસ્કૃતિક વારસાને થતા નુકસાનને અટકાવે અને હિસાનો આશરો લીધા વિના ઉકેલ શોધે તે જરૂરી છે.

જયસ્વાલે સ્પષ્ટતા કરી કે ધાર્મિક અને સાંસ્કૃતિક આદર બધા સમુદાયો માટે અત્યંત મહત્વપૂર્ણ છે, અને તેનું રક્ષણ કર્યા વિના કાયમી શાંતિ અશકય છે. નોંધનીય છે કે જ્યારે આ મુદ્દો વકર્યો, ત્યારે થાઈ સૈન્યએ પણ એક નિવેદન બહાર પાડ્યું. થાઈલેન્ડે જણાવ્યું હતું કે કંબોડિયાએ જાણી જોઈને વિવાદિત વિસ્તારમાં પ્રતિમા બનાવી છે.