નવી દિલ્હી, તા. 25 : ભારતના લોકશાહી ઇતિહાસમાં આજે એક સુવર્ણ પ્રકરણ ઉમેરાયું છે. રાષ્ટ્રપતિ ભવન ખાતે આયોજિત એક ભવ્ય સમારોહમાં રાષ્ટ્રપતિ દ્રૌપદી મુર્મુએ ભારતના બંધારણની 'સંથાલી' આવૃત્તિનું વિમોચન કર્યું છે. આ બંધારણ સંથાલી ભાષાની પોતાની લિપિ 'ઓલ ચીકી' માં પ્રકાશિત કરવામાં આવ્યું છે. આ પ્રસંગે રાષ્ટ્રપતિએ હર્ષ વ્યક્ત કરતા જણાવ્યું હતું કે, સંથાલી સમુદાય માટે આ અત્યંત ગર્વની ક્ષણ છે કારણ કે હવે તેઓ પોતાની માતૃભાષામાં દેશના સર્વોચ્ચ કાયદાને વાંચી અને સમજી શકશે.
નોંધનીય છે કે આ વર્ષ 'ઓલ ચીકી' લિપિનું શતાબ્દી વર્ષ છે, અને આ ખાસ અવસરે કાયદા મંત્રાલય દ્વારા લેવામાં આવેલ આ પગલું આદિવાસી સંસ્કૃતિના જતન માટે સીમાચિહ્નરૂપ સાબિત થશે. રાષ્ટ્રપતિએ કાયદા અને ન્યાય મંત્રી અર્જુન રામ મેઘવાલ અને તેમની ટીમની પ્રશંસા કરતા કહ્યું કે, આનાથી ઓડિશા, ઝારખંડ, પશ્ચિમ બંગાળ, આસામ અને બિહારમાં વસતા સંથાલી લોકો બંધારણના અનુચ્છેદોને મૂળભૂત રીતે સમજી શકશે અને પોતાના અધિકારો પ્રત્યે જાગૃત થશે.
બંધારણની આઠમી અનુસૂચિમાં સ્થાન ધરાવે છે સંથાલી
સંથાલી ભાષા ભારતની સૌથી જૂની જીવંત ભાષાઓમાંની એક છે. વર્ષ 2003 માં 92મા બંધારણીય સુધારા દ્વારા તેને બંધારણની આઠમી અનુસૂચિમાં સામેલ કરવામાં આવી હતી. ભારતની વિવિધતામાં એકતાના પ્રતીક સમાન આ ભાષા હવે કાયદાકીય દસ્તાવેજ તરીકે પણ સત્તાવાર રીતે આદિવાસી હૃદયો સુધી પહોંચશે. આ કાર્યક્રમમાં ઉપરાષ્ટ્રપતિ સી.પી. રાધાકૃષ્ણન સહિત અનેક મહાનુભાવો ઉપસ્થિત રહ્યા હતા.
રાષ્ટ્રપતિએ પોતાના સત્તાવાર સોશિયલ મીડિયા હેન્ડલ પર પણ આ આનંદ વ્યક્ત કર્યો હતો અને જણાવ્યું હતું કે, માતૃભાષામાં બંધારણની ઉપલબ્ધતા એ સાચા અર્થમાં સમાવેશી લોકશાહીનો વિજય છે.