નવી દિલ્હી: સામાન્ય રીતે કેન્દ્ર સરકારની નીતિઓ સામે આકરા પ્રહારો કરવા માટે જાણીતા કોંગ્રેસના વરિષ્ઠ સાંસદ શશી થરૂરે ઘૂસણખોરીના સંવેદનશીલ મુદ્દે સરકારનું સમર્થન કરીને સૌને ચોંકાવી દીધા છે. થરૂરે અત્યંત સ્પષ્ટ શબ્દોમાં જણાવ્યું છે કે જો કોઈ વ્યક્તિ ભારતમાં ગેરકાયદેસર રીતે પ્રવેશ કરે છે અથવા વિઝાની મુદત પૂરી થયા પછી પણ રોકાય છે, તો સરકારને તેને દેશનિકાલ કરવાનો સંપૂર્ણ અને કાયદેસરનો અધિકાર છે. તેમણે આને માત્ર રાષ્ટ્રીય સુરક્ષાનો મુદ્દો જ નહીં, પરંતુ દેશની સરહદ વ્યવસ્થાપન અને ઇમિગ્રેશન કન્ટ્રોલની 'પ્રણાલીગત નિષ્ફળતા' ગણાવી છે. થરૂરના મતે, ગેરકાયદેસર ઇમિગ્રન્ટ્સની હાજરી એ સાબિત કરે છે કે આપણી સરહદો પર જે નિયંત્રણ હોવું જોઈએ તેમાં ક્યાંક મોટી ખામી રહી ગઈ છે.

પોતાની આગવી બૌદ્ધિક શૈલીમાં વાત કરતા થરૂરે બાંગ્લાદેશના પૂર્વ વડાપ્રધાન શેખ હસીનાના મુદ્દે પણ ભારત સરકારના વલણનો બચાવ કર્યો છે. તેમણે કહ્યું કે શેખ હસીના ભારતની વર્ષો જૂની અને વિશ્વસનીય મિત્ર રહી છે, તેથી તેમને આ કપરા સમયમાં આશરો આપવો એ ભારતની 'યોગ્ય માનવતાવાદી ભાવના' દર્શાવે છે. થરૂરે દલીલ કરી હતી કે પ્રત્યાર્પણ કે દેશનિકાલ જેવા કેસો અત્યંત જટિલ કાનૂની માળખા હેઠળ આવતા હોય છે, જેમાં માત્ર કાયદો જ નહીં પરંતુ આંતરરાષ્ટ્રીય સંબંધો અને માનવતાના મૂલ્યો પણ જોડાયેલા હોય છે. તેથી, આવા સંવેદનશીલ કિસ્સાઓમાં અંતિમ નિર્ણય લેવાની સત્તા સરકારના વિવેકબુદ્ધિ પર છોડવી જોઈએ.

જોકે, કાયદાના કડક પાલનની સાથે થરૂરે સંતુલિત અને માનવતાવાદી અભિગમ રાખવાની પણ ટકોર કરી છે. તેમણે સરહદ સુરક્ષાને વધુ મજબૂત કરવા પર ભાર મૂકતા કહ્યું કે, જો આપણે આપણી સરહદોને વધુ સુરક્ષિત બનાવીશું તો જ ભવિષ્યમાં આવા વિવાદોને ટાળી શકાશે. એક તરફ વિપક્ષ જ્યારે સરકારને ઘેરવાની કોશિશ કરી રહ્યો છે, ત્યારે થરૂરનું આ વલણ દર્શાવે છે કે રાષ્ટ્રીય સુરક્ષાના હિતમાં તેઓ રાજનીતિથી ઉપર ઉઠીને વિચારી રહ્યા છે. આ નિવેદન બાદ હવે જોવાનું એ રહેશે કે કોંગ્રેસના અન્ય નેતાઓ અને સત્તાધારી પક્ષ આ પ્રતિક્રિયાને કઈ રીતે જુએ છે.