નવી દિલ્હી: દેશની રાજધાની દિલ્હીમાં આજે પૂર્વ વડાપ્રધાન અટલ બિહારી વાજપેયીની 101મી જન્મજયંતિ પર ગરીબોના હિતમાં એક ક્રાંતિકારી યોજનાનો પ્રારંભ થયો છે. દિલ્હી સરકાર દ્વારા 'અટલ કેન્ટીન' યોજના હેઠળ પ્રથમ તબક્કામાં 45 સ્થળોએ માત્ર 5 રૂપિયામાં પૌષ્ટિક ભોજન આપવાનું શરૂ કરાયું છે. મુખ્યમંત્રી રેખા ગુપ્તાએ પોતે કેન્ટીનની મુલાકાત લઈ સામાન્ય નાગરિકોની જેમ ભોજન કર્યું હતું અને વ્યવસ્થાઓની સમીક્ષા કરી હતી.
આ યોજનાનો મુખ્ય હેતુ મજૂરો, રિક્ષાચાલકો અને શહેરી ગરીબોને સન્માન સાથે પૌષ્ટિક ખોરાક પૂરો પાડવાનો છે. કેન્ટીનમાં પીરસવામાં આવતી એક થાળીમાં 4 રોટલી, દાળ, શાક, ભાત અને અથાણાંનો સમાવેશ થાય છે, જેનું કુલ વજન આશરે 600 ગ્રામ જેટલું હશે.
સમય અને ટોકન મેળવવાની અનોખી પદ્ધતિ: અટલ કેન્ટીનમાં ભોજનનો સમય નક્કી કરવામાં આવ્યો છે. બપોરનું ભોજન 12:00 થી 3:00 અને રાત્રિભોજન 6:00 થી 9:00 વાગ્યા સુધી મળશે. પારદર્શિતા જાળવવા માટે અહીં ડિજિટલ રજીસ્ટ્રેશન ફરજિયાત છે. ટોકન લેતા પહેલા ખેલાડીનો ફોટો અને નામ નોંધવામાં આવશે. ખાસ નોંધવા જેવી બાબત એ છે કે, એક વ્યક્તિને એક સમયે એક જ ટોકન મળશે અને બીજું ટોકન ત્રણ કલાકના અંતર બાદ જ મેળવી શકાશે.
દિલ્હીમાં ક્યાં-ક્યાં ખુલી છે કેન્ટીન? (મુખ્ય સ્થળો): સરકાર દ્વારા હાલમાં જે 45 કેન્ટીનો શરૂ કરાઈ છે, તેમાં મુખ્યત્વે નીચેના વિસ્તારોનો સમાવેશ થાય છે:
• ઉત્તર દિલ્હી: નરેલા (હોલંબી કલાન), બવાના (શાહબાદ દોલતપુર), આદર્શ નગર, તિમારપુર.
• પશ્ચિમ દિલ્હી: રાજૌરી ગાર્ડન, વિકાસપુરી, માદીપુર, મોતી નગર, દ્વારકા.
• દક્ષિણ દિલ્હી: મહેરૌલી, આર.કે. પુરમ, છત્તરપુર (ભાટી ખાણો), પાલમ.
• મધ્ય દિલ્હી: રાજીન્દર નગર, મટિયાલા, નજફગઢ.
આગામી દિવસોમાં કેન્ટીનોની સંખ્યા વધારીને 100 કરવામાં આવશે. તમામ કેન્ટીનોમાં એકસાથે 500 લોકોને બેસાડીને જમાડવાની ક્ષમતા છે. હાઈટેક કિચન અને સીસીટીવી કેમેરાથી સજ્જ આ કેન્ટીનો હવે દિલ્હીમાં ભૂખ સામેની લડાઈમાં નવું શસ્ત્ર સાબિત થશે