નવી દિલ્‍હીઃ તા.૨૬: NCR શહેરો સહિત રાજધાની દિલ્‍હીમાં છેલ્લા બે દિવસથી હવામાન સ્‍વચ્‍છ હતું, પરંતુ શુક્રવારે રાજધાની ધુમ્‍મસની જાડી ચાદરમાં ઢંકાઈ ગઈ હતી. આજે સવારે પણ હળવું ધુમ્‍મસ જોવા મળ્‍યું હતું.

પવન ન હોવાને કારણે હવાની ગુણવત્તા ફરીથી ગંભીર સ્‍તરે પહોંચી ગઈ છે. દરમિયાન, લોકો ઠંડીનો અનુભવ કરી રહ્યા છે. ગુરુવાર સવારની જેમ શુક્રવારે પણ લોકો ઠુઠવાયા હતા.

કેન્‍દ્રીય પ્રદૂષણ નિયંત્રણ બોર્ડ (CPCB) અનુસાર, શુક્રવારે સવારે દિલ્‍હીનો સરેરાશ AQI 300 થી ઉપર નોંધાયો હતો. વિસ્‍તારોની દ્રષ્ટિએ, આનંદ વિહારમાં સવારે ૭ વાગ્‍યે AQI 377 નોંધાયું હતું, જ્‍યારે બાવાનામાં ૩૬૩ નોંધાયું હતું. બુરાડીમાં ૩૧૫, ચાંદની ચોકમાં ૩૩૯, દ્વારકામાં 282, ITOમાં ૩૧૪, જહાંગીરપુરીમાં ૩૭૨, મુંડકામાં ૩૦૭, નરેલામાં ૩૪૫, વિવેક વિહારમાં ૩૬૧ અને વઝીરપુરમાં ૩૪૩ નોંધાયું હતું.

દરમિયાન, નોઈડામાં ૨૯૭, ગ્રેટર નોઈડામાં ૩૩૭, ગાઝિયાબાદમાં ૩૨૯ અને ગુરુગ્રામમાં ૩૭૫ નોંધાયા. દિલ્‍હીનો સરેરાશ AQI 234 હતો, જે ‘‘ખરાબ'' શ્રેણીમાં આવે છે. હવા ગુણવત્તા દેખરેખ પ્રણાલી અનુસાર, પ્રદૂષણની સ્‍થિતિમાં બહુ જલ્‍દી સુધારો થવાની શકયતા નથી.

ગુરુવારે હવાની ગુણવત્તામાં સુધારો ચાલુ રહ્યો અને તે ‘‘ખરાબ'' શ્રેણીમાં રહી, AQI 300 ની નીચે. જોકે, શુક્રવારથી તે ફરીથી બગડવાની અને ૩૦૦ થી ઉપર ‘‘ખૂબ જ ખરાબ'' શ્રેણીમાં પાછી ફરવાની ધારણા છે.