સિઓલ  : દક્ષિણ કોરિયાના સુપ્રસિદ્ધ મ્યુઝિક ગ્રુપ NCT ના ભૂતપૂર્વ સભ્ય તૈલ (Taeil) માટે કાયદાકીય લડાઈનો કરુણ અંત આવ્યો છે. ૨૦૨૩ ના ચકચારી 'ગંભીર બળાત્કાર' કેસમાં દક્ષિણ કોરિયાની સુપ્રીમ કોર્ટે તેની અંતિમ અપીલ ફગાવી દીધી છે. કોર્ટના આ આખરી ચુકાદા બાદ, ૩૧ વર્ષીય તૈલને હવે ૩ વર્ષ અને ૬ મહિનાની જેલની સજા ભોગવવી પડશે. ક્યારેક કરોડો યુવાનોના દિલ પર રાજ કરનાર આ કલાકારનું આખું કરિયર હવે જેલના સળિયા પાછળ ધકેલાઈ ગયું છે.
શું હતી સમગ્ર ઘટના?
તપાસમાં બહાર આવ્યું છે કે જૂન ૨૦૨૩ માં, તૈલ અને તેના અન્ય બે પરિચિતો (લી અને હોંગ) એ મળીને એક વિદેશી મહિલા પર જાતીય હુમલો કર્યો હતો. પીડિત મહિલા તે સમયે નશામાં હોવાથી પ્રતિકાર કરવાની સ્થિતિમાં નહોતી. કોર્ટે આ ગુનાને અત્યંત ગંભીર ગણાવતા નોંધ્યું હતું કે, "એક વિદેશી પર્યટક જ્યારે અજાણ્યા દેશની મુલાકાતે હોય, ત્યારે તેની પર આવો હુમલો થવો તે તેને ઊંડો માનસિક આઘાત પહોંચાડે તેવી ઘટના છે."
કોર્ટે ફટકારી સખત સજા
ઓક્ટોબર ૨૦૨૫ માં સિઓલ હાઈકોર્ટે નીચલી અદાલતના ચુકાદાને યથાવત રાખ્યો હતો. જેલવાસની સાથે, તૈલને ૪૦ કલાકનો જાતીય હિંસા વિરોધી સારવાર કાર્યક્રમ પૂર્ણ કરવાની પણ તાકીદ કરવામાં આવી છે. વધુમાં, જેલમાંથી બહાર આવ્યા પછી પણ ૫ વર્ષ સુધી તે બાળકો, કિશોરો કે અપંગ વ્યક્તિઓ સાથે જોડાયેલી કોઈ પણ સંસ્થામાં નોકરી કરી શકશે નહીં. તેની કાનૂની ટીમે 'સ્વૈચ્છિક સમર્પણ' ના આધારે દયાની માંગણી કરી હતી, પરંતુ સુપ્રીમ કોર્ટે તેને ફગાવી દીધી છે.
ચમકતા સ્ટારડમનો આઘાતજનક અંત
તૈલે ૨૦૧૬ માં NCT U અને ત્યારબાદ NCT 127 ના સભ્ય તરીકે K-પોપ ઇન્ડસ્ટ્રીમાં ધમાકેદાર પ્રવેશ કર્યો હતો. તેની ગાયકીના લાખો ચાહકો હતા. જોકે, આ કેસ સામે આવ્યા બાદ ઓગસ્ટ ૨૦૨૪ માં તેની કંપની 'SM એન્ટરટેઈનમેન્ટ' એ તેને તાત્કાલિક ગ્રુપમાંથી હાંકી કાઢ્યો હતો. જૂન ૨૦૨૫ માં તેની ઔપચારિક અટકાયત કરવામાં આવી હતી, જે હવે સુપ્રીમ કોર્ટના આદેશ બાદ કાયમી જેલવાસમાં ફેરવાઈ છે.
આ ઘટનાએ ફરી એકવાર મનોરંજન જગતમાં કલાકારોના અંગત જીવન અને તેમના નૈતિક મૂલ્યો પર મોટા સવાલો ઉભા કર્યા છે.