નવી દિલ્હી : ભારતની વિકાસ યાત્રામાં ૨૦૨૫નું વર્ષ સુવર્ણ અક્ષરે લખાવા જઈ રહ્યું છે. આકાશવાણી ન્યૂઝની વિશેષ શ્રેણી 'સુધારાઓનું વર્ષ' અંતર્ગત કરવેરા ક્ષેત્રે ભારતની જે પ્રગતિ નોંધાઈ છે, તેણે સામાન્ય નાગરિકથી લઈને મોટા ઉદ્યોગપતિઓ સુધી તમામને મોટી રાહત આપી છે. દાયકાઓ જૂની જટિલ કર વ્યવસ્થાને હવે પારદર્શક અને નાગરિક-કેન્દ્રીય બનાવવામાં આવી છે.
GST માં ઐતિહાસિક ફેરફાર: હવે માત્ર બે મુખ્ય સ્લેબ
વર્ષ ૨૦૧૭માં GST ના અમલીકરણ બાદ જે ગૂંચવણો હતી, તેનો ૨૦૨૫માં અંત આવ્યો છે. સરકારે GST સ્લેબને તર્કસંગત બનાવીને માત્ર ૫% અને ૧૮% ના બે મુખ્ય સ્લેબમાં વિભાજિત કર્યા છે. આ વર્ષના સૌથી મોટા સમાચાર એ છે કે હવે વીમા પ્રીમિયમ પર GST ઘટાડીને શૂન્ય (૦%) કરી દેવામાં આવ્યો છે. આ સુધારાને કારણે જીવનજરૂરી ચીજવસ્તુઓ સસ્તી થઈ છે અને વેપારીઓ માટે પાલન પ્રક્રિયા એકદમ સરળ બની છે.
મધ્યમ વર્ગની દિવાળી સુધરી: ૧૨ લાખ સુધી કોઈ ટેક્સ નહીં
આવકવેરા (Income Tax) ના ક્ષેત્રમાં પણ મધ્યમ વર્ગને જબરદસ્ત ભેટ મળી છે. વર્ષ ૨૦૧૪માં જે મુક્તિ મર્યાદા માત્ર ૨ લાખ રૂપિયા હતી, તે હવે ૨૦૨૫માં વધારીને ૧૨ લાખ રૂપિયા કરી દેવામાં આવી છે. આ ફેરફાર અને GST કાપના કારણે ભારતીય પરિવારોમાં વાર્ષિક અંદાજે અઢી લાખ કરોડ રૂપિયાની બચત થવાની આશા છે. આ જ કારણ છે કે આ વર્ષે દિવાળી પર ભારતે ૬ ટ્રિલિયન રૂપિયાથી વધુનું વિક્રમી વેચાણ નોંધાવ્યું છે.
ભયથી ભરોસા સુધીની સફર
૧૯૭૦ના દાયકામાં જ્યારે આવકવેરાનો દર ૯૭.૫ ટકા જેવો અસહ્ય હતો, ત્યારે લોકોમાં ટેક્સ ચોરી અને ડરનો માહોલ હતો. મહાત્મા ગાંધીએ જે મીઠાના કર સામે લડત આપી હતી, તે અન્યાયી કરવેરાના વારસાને ખતમ કરીને હવે 'વિશ્વાસ આધારિત' સિસ્ટમ વિકસાવવામાં આવી છે. ઓટોમોબાઈલથી લઈને ઈલેક્ટ્રોનિક્સ સુધીના ક્ષેત્રોમાં થયેલો રેકોર્ડબ્રેક ઉછાળો સાબિત કરે છે કે યોગ્ય નીતિઓથી દેશનું અર્થતંત્ર રોકેટ ગતિએ આગળ વધી શકે છે.
આ સુધારા માત્ર નાણાકીય ફેરફાર નથી, પરંતુ એક એવા ભારતનું નિર્માણ છે જ્યાં ટેક્સ એ બોજ નહીં પણ રાષ્ટ્ર નિર્માણનું એક ગૌરવશાળી માધ્યમ છે.