જમ્મુ:જમ્મુ-કાશ્મીરમાં જ્યારે તાપમાન શૂન્યથી ઘણું નીચે જાય છે અને ૪૦ દિવસનો કઠોર 'ચિલ્લાઈ કલાન'નો સમયગાળો શરૂ થાય છે, ત્યારે કુદરતની આ કસોટી વચ્ચે ભારતીય સેનાએ આતંકવાદ વિરુદ્ધ મરણિયું જંગ છેડ્યું છે. ગુપ્તચર અહેવાલો મુજબ, આશરે ૩૦ થી ૩૫ જેટલા પાકિસ્તાની આતંકવાદીઓ હાલમાં કિશ્તવાડ અને ડોડાના પર્વતીય વિસ્તારોમાં છુપાયેલા છે. આ આતંકીઓ શિયાળાનો ફાયદો ઉઠાવી ઘૂસણખોરી કરવાની પેરવીમાં છે, પરંતુ ભારતીય સૈનિકોએ અભેદ્ય સુરક્ષા કવચ તૈયાર કર્યું છે. પહાડોની ઉંચાઈ અને ગાઢ જંગલોમાં છુપાયેલા આ 'સફેદ આફત' સમાન આતંકીઓને શોધી કાઢવા માટે સેનાએ પેટ્રોલીંગ તેજ કરી દીધું છે.

આ વખતે આતંકવાદ વિરોધી વ્યૂહરચનામાં એક મોટો બદલાવ જોવા મળ્યો છે. સેનાએ માત્ર પોતાના દમ પર જ નહીં, પરંતુ જમ્મુ-કાશ્મીર પોલીસ, CRPF, સ્પેશિયલ ઓપરેશન ગ્રુપ (SOG) અને ફોરેસ્ટ ગાર્ડ સહિતની અનેક એજન્સીઓને સાથે રાખીને એક સંયુક્ત 'વોર રૂમ' તૈયાર કર્યો છે. નિવૃત્ત મેજર જનરલ એસકે સિંહના જણાવ્યા મુજબ, દરેક એજન્સી પાસેથી મળેલી ઝીણવટભરી માહિતીને આધારે હવે 'સર્જિકલ પ્રિસિઝન' સાથે હુમલા કરવામાં આવશે. આ સંકલનનો સૌથી મોટો ફાયદો એ છે કે આતંકીઓની હિલચાલ પર નજર રાખવાનો પ્રતિસાદ સમય (Reaction Time) ઘણો ઘટી ગયો છે, જેનાથી આતંકીઓને ભાગવાનો મોકો નહીં મળે.

સૌથી પ્રેરણાદાયક બાબત એ છે કે સ્થાનિક લોકો પણ હવે આતંકીઓ સામે ઢાલ બનીને ઉભા છે. આતંકીઓ સ્થાનિક રહેવાસીઓને બંદૂકની અણીએ ખાવા-પીવાની સુવિધા આપવા ધમકાવી રહ્યા છે, પરંતુ ભારતીય સેના પરના અતૂટ વિશ્વાસને કારણે ગ્રામજનોએ આતંકીઓને મદદ કરવાનો સ્પષ્ટ ઇનકાર કરી દીધો છે. સેનાએ 'પ્લાન A' હેઠળ આતંકીઓને શોધીને ખતમ કરવાની અને 'પ્લાન B' હેઠળ નવી ઘૂસણખોરી રોકવાની તૈયારી કરી છે. 'સ્વીપ સર્વેલન્સ ઓપરેશન' દ્વારા ખીણના ખૂણેખૂણા પર નજર રાખવામાં આવી રહી છે, જેથી આ શિયાળો પાકિસ્તાની આતંકવાદનો અંતિમ શિયાળો સાબિત થાય.