નવી દિલ્હી:  જો તમે હજુ સુધી તમારા PAN કાર્ડને આધાર સાથે લિંક નથી કર્યું, તો સાવધાન થઈ જવાની જરૂર છે. આવકવેરા વિભાગ દ્વારા જારી કરાયેલ અંતિમ ચેતવણી મુજબ, ૩૧ ડિસેમ્બર ૨૦૨૫ એ PAN ને આધાર સાથે જોડવાની છેલ્લી તારીખ છે. જો આ સમયમર્યાદા ચૂકી ગયા, તો ૧ જાન્યુઆરી ૨૦૨૬થી તમારું PAN કાર્ડ નિષ્ક્રિય (Inoperative) થઈ જશે, જેનો અર્થ છે કે તમે તેનો ઉપયોગ ક્યાંય પણ દસ્તાવેજ તરીકે કરી શકશો નહીં.
PAN કાર્ડ નિષ્ક્રિય થવાને કારણે સામાન્ય માણસના ખિસ્સા પર સીધી અસર પડશે. જો તમારું PAN કાર્ડ ચાલુ નહીં હોય, તો તમારે વધુ TDS (Tax Deducted at Source) ચૂકવવો પડશે. આ ઉપરાંત, આવકવેરા રિટર્ન (ITR) ફાઇલ કરવામાં મુશ્કેલી પડશે અને અટકેલા ટેક્સ રિફંડ પણ મેળવી શકાશે નહીં. બેંકિંગ વ્યવહારોમાં પણ ₹૫૦,૦૦૦થી વધુની રોકડ જમા કરાવવા કે નવા ક્રેડિટ-ડેબિટ કાર્ડ મેળવવામાં ટેકનિકલ અવરોધો આવશે.
જે કરદાતાઓએ અત્યાર સુધી લિંકિંગ પ્રક્રિયા પૂરી નથી કરી, તેમણે હવે ₹૧,૦૦૦નો દંડ ભરીને જ આ પ્રક્રિયા પૂર્ણ કરવી પડશે. લિંક કરવા માટે તમારે આવકવેરા વિભાગના સત્તાવાર ઈ-ફાઈલિંગ પોર્ટલ પર જઈને 'Link Aadhaar' વિકલ્પ પસંદ કરવાનો રહેશે. ત્યાં તમારો PAN અને આધાર નંબર દાખલ કરી, OTP દ્વારા વેરિફિકેશન કરવાનું રહેશે. ચુકવણી કર્યાના થોડા દિવસોમાં તમારું લિંકિંગ સ્ટેટસ અપડેટ થઈ જશે.
માત્ર બેંક જ નહીં, પણ શેરબજારમાં રોકાણ (Demat Account) અને મ્યુચ્યુઅલ ફંડ માટે પણ PAN-આધાર લિંક હોવું અનિવાર્ય છે. જો PAN નિષ્ક્રિય થશે, તો તમારા KYC સ્ટેટસ પર પ્રતિબંધ લાદવામાં આવશે, જેનાથી તમારી વર્ષોની મહેનતની કમાણીનું રોકાણ પણ અટકી શકે છે. તેથી, વર્ષ પૂરું થાય તે પહેલાં આ કામ પતાવી લેવું હિતાવહ છે