વાશિમ: મહારાષ્ટ્રના વાશિમ જિલ્લામાં આવેલું પવિત્ર શિરપુર જૈન તીર્થ ફરી એકવાર લોહિયાળ સંઘર્ષનું સાક્ષી બન્યું છે. જેને જૈન ધર્મનું કાશી માનવામાં આવે છે, તેવા અંતરિક્ષ પાર્શ્વનાથ મંદિરમાં ભક્તિના સ્થાને ભયનો માહોલ જોવા મળ્યો હતો. શનિવારે બપોરે પાંચથી છ લોકોના ટોળાએ વિજય જૈન નામના યુવકને પવિત્ર મંદિર પરિસરમાંથી બળજબરીપૂર્વક ખેંચી કાઢ્યો હતો અને રસ્તા પર લાવી લાકડીઓ, લાતો અને મુક્કાઓથી નિર્દયતાથી માર માર્યો હતો. આ હુમલામાં વિજય જૈનને પગના ભાગે ગંભીર ઇજાઓ પહોંચી છે અને હાલ તેઓ હોસ્પિટલમાં સારવાર હેઠળ છે.
આ સમગ્ર હિંસાના મુળ 26 ડિસેમ્બરના રોજ થયેલા એક નાના ઝઘડામાં રહેલા છે. દિગંબર સમુદાયના વિજય જૈને અગાઉની અથડામણ અંગે શિરપુર પોલીસ સ્ટેશનમાં ફરિયાદ નોંધાવી હતી, જેનો બદલો લેવા માટે શ્વેતાંબર સંપ્રદાયના કેટલાક ઉશ્કેરાયેલા સભ્યોએ આ હુમલો કર્યો હોવાનું મનાય છે. આ ભયાનક દ્રશ્યો સીસીટીવી કેમેરામાં કેદ થયા છે, જેમાં દેખાઈ રહ્યું છે કે હુમલાખોરો ધાર્મિક મર્યાદા ભૂલીને યુવક પર તૂટી પડ્યા હતા. આ ઘટનાનો વીડિયો સોશિયલ મીડિયા પર વાયરલ થતા જ દેશભરના જૈન સમુદાયમાં રોષની લાગણી ફેલાઈ ગઈ છે.
અંતરિક્ષ પાર્શ્વનાથ મંદિરનો આ વિવાદ 100 વર્ષ કરતા પણ વધુ જૂનો છે, જે મુખ્યત્વે મંદિરના સંચાલન અને પૂજા કરવાની પદ્ધતિ પર આધારિત છે. શ્વેતાંબર સંપ્રદાય મૂર્તિને આભૂષણો, મુગટ અને વસ્ત્રોથી શણગારીને પૂજા કરવામાં માને છે, જ્યારે દિગંબર સમુદાય મૂર્તિના નગ્ન સ્વરૂપ (કોઈપણ શણગાર વિના) ની પૂજાના આગ્રહી છે. આ વૈચારિક મતભેદ અવારનવાર હિંસક સ્વરૂપ ધારણ કરે છે. માર્ચ 2023 અને જૂન 2024 માં પણ અહીં આવી જ ગંભીર અથડામણો થઈ હતી, છતાં વહીવટીતંત્ર કાયમી ઉકેલ લાવવામાં નિષ્ફળ રહ્યું હોય તેવું જણાય છે.
આ કાયરતાપૂર્ણ હુમલાના વિરોધમાં દિગંબર જૈન સમુદાયે રવિવારે બપોરે 2 વાગ્યે શિરપુર પોલીસ સ્ટેશન સુધી વિશાળ વિરોધ કૂચ કાઢવાની જાહેરાત કરી છે. ભક્તોએ જિલ્લા પોલીસ અધિક્ષકને રજૂઆત કરી છે કે પવિત્ર તીર્થક્ષેત્રમાં આવી ગુંડાગીરી ચલાવી લેવામાં આવશે નહીં. હાલમાં પરિસ્થિતિ વધુ ન બગડે તે માટે શિરપુર વિસ્તારમાં ચુસ્ત પોલીસ બંદોબસ્ત ગોઠવી દેવામાં આવ્યો છે. આ ઘટનાએ ફરી એકવાર ધાર્મિક સંહિતા અને સામાજિક શાંતિ સામે પ્રશ્નાર્થ ચિહ્નો ઉભા કર્યા છે.