જમ્મુ : જમ્મુ-કાશ્મીરમાં જ્યારે ૪૦ દિવસનો કઠોર શિયાળો એટલે કે 'ચિલ્લઈ કલાન' પોતાની ચરમસીમાએ છે, ત્યારે ભારતીય સેનાએ આતંકવાદીઓ વિરુદ્ધ એક મોટું અભિયાન છેડ્યું છે. ગુપ્તચર એજન્સીઓના રિપોર્ટ મુજબ, અંદાજે ૩૦ જેટલા તાલીમબદ્ધ પાકિસ્તાની આતંકવાદીઓ જમ્મુ પ્રદેશના પહાડી વિસ્તારોમાં સક્રિય હોવાની આશંકા છે. આ આતંકવાદીઓ શિયાળાની મોસમ અને ગાઢ ધુમ્મસનો લાભ ઉઠાવીને ફરી સક્રિય થવાની પેરવીમાં હતા, પરંતુ સેનાએ તેમની આ ગણતરી ઉંધી પાડી દીધી છે. બરફથી ઢંકાયેલા ઉંચાઈવાળા વિસ્તારોમાં સેનાએ પોતાની ગતિવિધિઓ વધારીને આતંકવાદ વિરોધી સુરક્ષા કવચ વધુ મજબૂત બનાવ્યું છે.

સંરક્ષણ સૂત્રોના જણાવ્યા અનુસાર, આતંકવાદીઓએ અત્યારે પોતાની રણનીતિ બદલી છે. સેનાના સતત દબાણને કારણે આતંકવાદીઓ હવે વસ્તીવાળા વિસ્તારો છોડીને કિશ્તવાડ અને ડોડાના ઉંચા પહાડી જંગલોમાં આશરો લઈ રહ્યા છે. આ એવા વિસ્તારો છે જ્યાં સામાન્ય નાગરિકોની અવરજવર ન્યૂનતમ હોય છે અને ભૌગોલિક પરિસ્થિતિઓ અત્યંત કપરી હોય છે. આતંકવાદીઓનો હેતુ શિયાળા દરમિયાન આ દુર્ગમ પહાડોમાં છુપાઈને ફરીથી સંગઠિત થવાનો છે, જેથી ઉનાળો આવતા જ તેઓ મોટા હુમલા કરી શકે. જોકે, ભારતીય જવાનો આધુનિક ગેજેટ્સ અને થર્મલ ઇમેજિંગ કેમેરાની મદદથી આતંકવાદીઓના દરેક હલચલ પર નજર રાખી રહ્યા છે.

આ શિયાળુ કાર્યવાહીમાં સેનાના વિશેષ દળો (Special Forces) અને સ્થાનિક પોલીસના સંયુક્ત ઓપરેશન પર ભાર મૂકવામાં આવ્યો છે. ચિલ્લઈ કલાનનો સમયગાળો પરંપરાગત રીતે ઓછી પ્રવૃત્તિનો માનવામાં આવતો હતો, પરંતુ આ વખતે સેનાએ 'મોસમી મંદી'ની રાહ જોયા વગર આક્રમક વલણ અપનાવ્યું છે. સૈનિકો રાઉન્ડ-ધ-ક્લોક પેટ્રોલિંગ કરી રહ્યા છે જેથી ઘૂસણખોરી અને સ્થાનિક સ્તરે આતંકવાદીઓની મદદ કરનારા 'ઓવર ગ્રાઉન્ડ વર્કર્સ' (OGWs) નું નેટવર્ક તોડી શકાય. સેનાનો મુખ્ય લક્ષ્ય આતંકવાદીઓને તેમની સુરક્ષિત જગ્યાઓ પરથી બહાર કાઢીને ઠાર કરવાનો છે.

ભૌગોલિક પડકારો વચ્ચે પણ ભારતીય સેનાના જવાનોનો જુસ્સો બુલંદ છે. બરફવર્ષા અને માઈનસ ડિગ્રી તાપમાનમાં પણ સેનાએ કિશ્તવાડના ઉંચા પહાડોમાં પોતાની ચોકીઓ વધુ મજબૂત બનાવી છે. આ ઓપરેશન દ્વારા પાકિસ્તાનને પણ સ્પષ્ટ સંદેશ આપવામાં આવ્યો છે કે શિયાળાની આડમાં આતંકવાદને પ્રોત્સાહન આપવાની તેની કોઈપણ કોશિશ સફળ થવા દેવામાં આવશે નહીં. આગામી દિવસોમાં આ સર્ચ ઓપરેશન હજુ પણ વધુ તીવ્ર બનવાની શક્યતા છે, જે આ પ્રદેશમાં શાંતિ સ્થાપવા માટે અત્યંત નિર્ણાયક સાબિત થશે.