નાંદેડ : મહારાષ્ટ્રના નાંદેડ જિલ્લામાંથી માતૃત્વ અને પિતૃત્વને હચમચાવી દેતી એક કાળજું કંપાવી દે તેવી ઘટના સામે આવી છે. એક ખેડૂત પરિવારના ચાર સભ્યોના રહસ્યમય મૃત્યુએ સમગ્ર પંથકમાં ચકચાર મચાવી દીધી હતી. પોલીસ તપાસમાં જે સત્ય બહાર આવ્યું તે સાંભળીને સૌના રુંવાડા ઉભા થઈ ગયા છે. બે સગા ભાઈઓએ જન્મોજન્મનો સાથ નિભાવનારા પોતાના જ માતા-પિતાની ગળું દબાવીને હત્યા કરી નાખી હતી. આ ભયાનક પગલું ભર્યા બાદ બંને ભાઈઓએ રેલવે ટ્રેક પર જઈને ટ્રેન સામે કૂદીને આત્મહત્યા કરી લીધી હતી. એક જ પરિવારની ચાર-ચાર અર્થીઓ ઉઠતા ગામ આખું હિબકે ચડ્યું છે.

પોલીસના જણાવ્યા અનુસાર, આ આખી ઘટના પાછળ ભયંકર આર્થિક તંગી અને ઘરની વિષમ પરિસ્થિતિ જવાબદાર છે. પ્રાથમિક તપાસમાં બહાર આવ્યું છે કે આ ખેડૂત પરિવાર લાંબા સમયથી દેવામાં ડૂબેલો હતો. ઘરમાં કમાનાર કોઈ સશક્ત સભ્ય રહ્યો નહોતો અને આર્થિક બોજ સતત વધી રહ્યો હતો. પિતા લાંબા સમયથી લકવાગ્રસ્ત (પેરાલિસિસ) હતા અને પથારીવશ હતા. પિતાની સારવારનો ખર્ચ અને રોજિંદા ગુજરાન માટેના ફાંફાએ બંને દીકરાઓને માનસિક રીતે તોડી નાખ્યા હતા, જેના કારણે તેમણે આ સામૂહિક આત્મહત્યા અને હત્યાનો રસ્તો પસંદ કર્યો હોવાનું જણાય છે.

પોસ્ટમોર્ટમ રિપોર્ટમાં પણ અત્યંત ચોંકાવનારો ખુલાસો થયો છે. રિપોર્ટ મુજબ, જ્યારે માતા-પિતા ગાઢ નિદ્રામાં હતા, ત્યારે બંને દીકરાઓએ રૂમમાં પ્રવેશીને તેમને પ્રતિકાર કરવાની તક આપ્યા વગર જ ગળું દબાવી દીધું હતું. લકવાગ્રસ્ત પિતા હલનચલન પણ કરી શકે તેમ નહોતા, જ્યારે માતા પણ પુત્રોના આ ઘાતકી ઈરાદાથી અજાણ હતા. ઊંઘમાં જ માતા-પિતાની જીવનલીલા સંકેલી લીધા બાદ, ગુનાના પસ્તાવા અને ભવિષ્યના ડરથી બંને ભાઈઓ નજીકના રેલવે ટ્રેક પર પહોંચ્યા હતા અને જીવન ટૂંકાવી લીધું હતું.

આ ઘટનાએ ખેતીકામ કરતા પરિવારોની સામાજિક અને આર્થિક સુરક્ષા પર મોટા સવાલો ઉભા કર્યા છે. નાંદેડ પોલીસ હવે એ દિશામાં તપાસ કરી રહી છે કે શું પરિવાર પર કોઈ ખાનગી શાહુકારનું દબાણ હતું કે પછી અન્ય કોઈ સામાજિક કારણોસર તેમણે આ આત્યંતિક પગલું ભર્યું. આ દુર્ઘટનાએ ફરી એકવાર સાબિત કર્યું છે કે આર્થિક ભીંસ અને માનસિક સ્વાસ્થ્યનું ધ્યાન ન રાખવામાં આવે તો તે કેવા વિનાશક પરિણામો લાવી શકે છે. હાલમાં સમગ્ર વિસ્તારમાં શોકનું મોજું ફરી વળ્યું છે અને પોલીસ કેસની ઝીણવટભરી તપાસ કરી રહી છે.