મુંબઈ : ભારતીય સ્ટાર્ટઅપ જગતમાં સનસનાટી મચાવનાર ક્વિક કોમર્સ કંપની Zepto એ હવે શેરબજારના મેદાનમાં ઉતરવાની સત્તાવાર તૈયારીઓ શરૂ કરી દીધી છે. કંપનીએ મૂડી બજાર નિયામક SEBI સમક્ષ 'કોન્ફિડેન્શિયલ પ્રી-ફાઇલિંગ' (ગુપ્ત માર્ગ) દ્વારા પોતાના IPO દસ્તાવેજો સબમિટ કર્યા છે. આ આઈપીઓ દ્વારા Zepto અંદાજે ₹11,000 કરોડનું માતબર ફંડ એકત્ર કરવાનું લક્ષ્ય રાખે છે. ૨૦૨૧માં અદિત પાલિચા અને કૈવલ્ય વોહરા નામના બે યુવા સાહસિકોએ શરૂ કરેલી આ કંપનીનું મૂલ્ય અત્યારે અંદાજે ૭ બિલિયન ડોલર (આશરે ₹૫૮,૦૦૦ કરોડ) સુધી પહોંચી ગયું છે, જે તેને ક્વિક કોમર્સ સેક્ટરની સૌથી પ્રભાવશાળી કંપની બનાવે છે.

Zepto એ જે 'ગુપ્ત માર્ગ' પસંદ કર્યો છે, તે કંપનીને તેની સંવેદનશીલ વ્યવસાયિક વિગતો અને નાણાકીય આંકડાઓ હરીફ કંપનીઓથી છુપાવવાની મંજૂરી આપે છે. સામાન્ય રીતે DRHP ફાઇલ કરવાથી બધી વિગતો જાહેર થઈ જાય છે, પરંતુ આ રૂટ હેઠળ જ્યાં સુધી કંપની લિસ્ટિંગ અંગે અંતિમ નિર્ણય ન લે ત્યાં સુધી ગોપનીયતા જળવાઈ રહે છે. સપ્ટેમ્બર ૨૦૨૫ સુધીમાં, Zepto એ દેશભરમાં ૯૦૦ થી વધુ ડાર્કનેટ સ્ટોર્સનું નેટવર્ક ઊભું કરી દીધું છે, જે ૧૦ મિનિટમાં ડિલિવરી કરવાના તેના વચનને મજબૂત બનાવે છે. અત્યાર સુધીમાં કંપનીએ વિવિધ રોકાણકારો પાસેથી કુલ $1.8 બિલિયન જેટલું ફંડ મેળવ્યું છે.

શેરબજારમાં Zepto ની ટક્કર સીધી રીતે લિસ્ટેડ જાયન્ટ્સ Zomato અને Swiggy સાથે થવાની છે. Zomato જુલાઈ ૨૦૨૧ માં લિસ્ટેડ થઈ હતી અને તેના IPO ને રોકાણકારો તરફથી અભૂતપૂર્વ પ્રતિસાદ મળ્યો હતો. તેવી જ રીતે, Swiggy પણ નવેમ્બર ૨૦૨૪ માં ₹૧૧,૩૨૭ કરોડનો IPO લાવીને બજારમાં લિસ્ટ થઈ હતી. હવે Zepto ની એન્ટ્રીથી ક્વિક કોમર્સ સેક્ટરમાં ત્રિપાંખિયો જંગ જામશે. રોકાણકારોમાં પણ આ યુવા સ્ટાર્ટઅપ પ્રત્યે ભારે ઉત્સાહ છે, કારણ કે Zepto એ બહુ ઓછા સમયમાં માર્કેટમાં મોટો હિસ્સો કબ્જે કર્યો છે.

આગામી વર્ષ ૨૦૨૬ માં જ્યારે Zepto સ્ટોક એક્સચેન્જ પર લિસ્ટ થશે, ત્યારે તે દેશના સૌથી મોટા આઈપીઓ પૈકીનો એક હોઈ શકે છે. આ ફંડનો ઉપયોગ કંપની તેના ડાર્ક સ્ટોર્સની સંખ્યા વધારવા, ટેકનોલોજીને વધુ સચોટ બનાવવા અને નવા શહેરોમાં વિસ્તરણ કરવા માટે કરશે. સેબીની મંજૂરી બાદ કંપની ટૂંક સમયમાં પબ્લિક ડોમેનમાં પોતાની વિગતો જાહેર કરશે. ક્વિક કોમર્સના વધતા જતા ક્રેઝ વચ્ચે રોકાણકારો માટે આ એક સુવર્ણ તક સાબિત થઈ શકે છે, જે ભારતીય ઇકોમર્સ લેન્ડસ્કેપને બદલી નાખવાની ક્ષમતા ધરાવે છે.