પટણા : બિહારના પૂર્વીય રેલવેમાં આસનસોલ ડિવિઝનના જસીડીહ-ઝાઝા સેક્શન પર રવિવારે વહેલી સવારે એક મોટી રેલ દુર્ઘટના સર્જાઈ છે. સિમુલતલા-તલવા બજાર હોલ્ટ નજીક બદુઆ નદીના પુલ પાસે એક માલગાડીના અનેક ડબ્બા પાટા પરથી ઉતરી જતાં દિલ્હી-હાવડા રેલવે લાઈન સંપૂર્ણપણે ઠપ્પ થઈ ગઈ છે. આ દુર્ઘટના એટલી ગંભીર છે કે માલગાડીના ડબ્બા પુલની આસપાસ વેરવિખેર થઈ ગયા છે, જેના કારણે રેલવે ટ્રેકને ભારે નુકસાન થયું છે. ઘટનાની જાણ થતાં જ રેલવેના ઉચ્ચ અધિકારીઓનો કાફલો ઘટનાસ્થળે પહોંચી ગયો છે અને યુદ્ધના ધોરણે ટ્રેક રિપેરિંગની કામગીરી શરૂ કરવામાં આવી છે.

આ અકસ્માતની સીધી અસર મુસાફરો પર પડી છે, કારણ કે રેલવે તંત્રએ તાત્કાલિક અસરથી ૧૧ પેસેન્જર ટ્રેનો રદ કરી દીધી છે. રદ કરાયેલી ટ્રેનોમાં હાવડા-દેહરાદૂન (12369), સિયાલદાહ-બલિયા (13105) અને મોકામા-હાવડા (13030) જેવી લાંબા અંતરની ટ્રેનો પણ સામેલ છે. લોકલ પેસેન્જર ટ્રેનો રદ થતા ગ્રામીણ વિસ્તારોના મુસાફરોમાં ભારે રોષ જોવા મળી રહ્યો છે. રેલવે સ્ટેશનો પર મુસાફરોની લાંબી લાઈનો લાગી છે અને પૂછપરછ કાઉન્ટર પર લોકો ભીડ જમાવી રહ્યા છે. અધિકારીઓના જણાવ્યા મુજબ, જ્યાં સુધી ટ્રેક સુરક્ષિત જાહેર ન થાય ત્યાં સુધી આ ટ્રેનો રદ રહેશે.

માત્ર ટ્રેનો રદ નથી થઈ, પરંતુ રેલવેએ ૧૨ થી વધુ પ્રીમિયમ ટ્રેનોના રૂટ પણ ડાયવર્ટ કર્યા છે. હાઈ-સ્પીડ પટના-હાવડા વંદે ભારત એક્સપ્રેસને હવે ગયા-ધનબાદ થઈને ચલાવવામાં આવી રહી છે. તેવી જ રીતે, નવી દિલ્હી-હાવડા રાજધાની અને અમૃતસર-હાવડા એક્સપ્રેસ જેવી મહત્વની ટ્રેનોને ભાગલપુર-સાહિબગંજ માર્ગ પર વાળવામાં આવી છે. રૂટ બદલાવાને કારણે આ ટ્રેનો તેના નિર્ધારિત સમય કરતા ૫ થી ૮ કલાક મોડી ચાલી રહી છે, જેના કારણે મુસાફરોને ખાવા-પીવાની અને રહેવાની ભારે હાલાકીનો સામનો કરવો પડી રહ્યો છે.

રેલવે પ્રશાસન દ્વારા જારી કરાયેલી યાદી મુજબ, કેટલીક ટ્રેનોને શોર્ટ ટર્મિનેટ પણ કરવામાં આવી છે. પટના-જસીડીહ એક્સપ્રેસ હવે ઝાઝા સુધી જ ચાલશે, જ્યારે અનેક પેસેન્જર ટ્રેનોને અધવચ્ચેથી જ પરત મોકલવામાં આવી રહી છે. બદુઆ નદી પરના પુલ પાસે માલગાડી કેવી રીતે પાટા પરથી ઉતરી ગઈ તે અંગે ટેકનિકલ તપાસના આદેશ આપવામાં આવ્યા છે. હાલમાં મુખ્ય ધ્યાન રેલવે વ્યવહારને પૂર્વવત કરવા પર છે, પરંતુ કાટમાળ ખસેડવામાં અને ટ્રેકનું પરીક્ષણ કરવામાં હજુ ૨૪ કલાકથી વધુ સમય લાગે તેવી શક્યતા છે.