કોલકાતા : પશ્ચિમ બંગાળમાં મતદાર યાદીના સ્પેશિયલ ઇન્ટેન્સિવ રિવિઝન (SIR) ને લઈને ચાલી રહેલા વિવાદ વચ્ચે ભારતીય ચૂંટણી પંચ (ECI) એ એક મહત્વપૂર્ણ સુધારો કર્યો છે. ચૂંટણી પંચે રાજ્યના ચૂંટણી અધિકારીઓને આદેશ આપ્યો છે કે ૨૦૦૨ની મતદાર યાદીમાં નોંધાયેલા પરંતુ હાલમાં 'અનમેપ્ડ' (જેમનો ડેટા ડિજિટલ સિસ્ટમ સાથે સુસંગત નથી) તરીકે ઓળખાયેલા મતદારોને વ્યક્તિગત સુનાવણી માટે બોલાવવામાં ન આવે.
BLO હવે ઘરે જઈને ખરાઈ કરશે
નવી સૂચના મુજબ, જે મતદારોના નામ ૨૦૦૨ની યાદીમાં છે પરંતુ અત્યારે ટેકનિકલ કારણોસર વિસંગતતા જણાય છે, તેમના ઘરે બૂથ લેવલ ઓફિસર (BLO) ને રૂબરૂ મોકલવામાં આવશે. BLO તે મતદાર સાથે સેલ્ફી અથવા ફોટો પાડીને સિસ્ટમમાં અપલોડ કરશે. જો ત્યારબાદ પણ કોઈ ગંભીર વિસંગતતા અથવા ફરિયાદ જણાશે, તો જ તે મતદારને નોટિસ આપીને સુનાવણી માટે બોલાવી શકાશે. ત્યાં સુધી આ ફાઈલો ચૂંટણી નોંધણી અધિકારી (ERO) પાસે જ રહેશે.
વિપક્ષ ટીએમસીનો ઉગ્ર વિરોધ
તૃણમૂલ કોંગ્રેસ (TMC) એ અગાઉ ચૂંટણી પંચની આકરી ટીકા કરી હતી. પાર્ટીનો આક્ષેપ હતો કે ૮૫ વર્ષથી વધુ ઉંમરના વૃદ્ધો અને દિવ્યાંગોને ભરશિયાળે સુનાવણીના કેમ્પમાં ધક્કા ખવડાવવા એ 'માનસિક ત્રાસ' સમાન છે. ટીએમસી સાંસદ પાર્થ ભૌમિક અને શશી પંજાએ સવાલ ઉઠાવ્યો હતો કે જો લોકસભા ચૂંટણીમાં પંચ 'વોટ ફ્રોમ હોમ' (ઘરે બેઠા મતદાન) ની સુવિધા આપી શકે છે, તો સુધારણા માટે તેમને કેમ ખેંચવામાં આવી રહ્યા છે?
૫૮ લાખથી વધુ નામ કમી થયા
નોંધનીય છે કે ૧૬ ડિસેમ્બરે પ્રસિદ્ધ થયેલી ડ્રાફ્ટ મતદાર યાદી બાદ વ્યાપક ચકાસણી હાથ ધરવામાં આવી હતી. જેમાં અંદાજે ૫૮ લાખ મતદારો એવા મળ્યા હતા જે કાં તો મૃત્યુ પામ્યા છે, સ્થળાંતર કરી ગયા છે અથવા લાંબા સમયથી ગેરહાજર છે. આ ઉપરાંત, ૩૧ લાખ એવા મતદારો પણ મળી આવ્યા છે જેમના નામ ૨૦૦૨ની જૂની યાદીમાં શોધવા છતાં મળ્યા નથી. આટલા મોટા પાયે નામો કમી થવાને કારણે રાજ્યમાં રાજકીય ગરમાવો જોવા મળી રહ્યો છે.
હાલ પૂરતું, જેમને નોટિસ મળી ચૂકી છે તેમની સુનાવણી ચાલુ રહેશે, પરંતુ નવા મતદારોને હવે આવી પરેશાની ભોગવવી નહીં પડે તેવી પંચે ખાતરી આપી છે.