દેહરાદૂન, તા.30 : ઉત્તરાખંડની સરકારી શાળાઓમાં અભ્યાસ કરતી વિદ્યાર્થીનીઓ માટે રાજ્ય સરકારે એક મહત્વપૂર્ણ ભેટની જાહેરાત કરી છે. આગામી 8 માર્ચ, 2026 એટલે કે 'આંતરરાષ્ટ્રીય મહિલા દિવસ' સુધીમાં રાજ્યની તમામ સરકારી પ્રાથમિક અને માધ્યમિક શાળાઓમાં વિદ્યાર્થીનીઓ માટે અલાયદા અને સુવિધાયુક્ત શૌચાલયોની ઉપલબ્ધતા સુનિશ્ચિત કરવામાં આવશે. રાજ્યના મુખ્ય સચિવ આનંદ વર્ધને સચિવાલય ખાતે યોજાયેલી ઉચ્ચ સ્તરીય બેઠકમાં આ અંગેના કડક નિર્દેશો જારી કર્યા છે.

જાળવણીના અભાવે સુવિધા નકામી ન બનવી જોઈએ

બેઠક દરમિયાન મુખ્ય સચિવે એક મહત્વના પાસા પર ભાર મૂકતા જણાવ્યું હતું કે, રાજ્યની મોટાભાગની શાળાઓમાં શૌચાલયની સુવિધા હોવા છતાં, યોગ્ય જાળવણી અને સફાઈના અભાવે તેનો ઉપયોગ થઈ શકતો નથી. આ સમસ્યાના કાયમી ઉકેલ માટે તેમણે શિક્ષણ વિભાગને તાત્કાલિક અસરકારક કાર્ય યોજના (Action Plan) રજૂ કરવા જણાવ્યું છે. સરકારનો ઉદ્દેશ્ય માત્ર માળખું ઊભું કરવાનો જ નહીં, પરંતુ તે દીકરીઓ માટે વાપરવા યોગ્ય રહે તે સુનિશ્ચિત કરવાનો પણ છે.

જિલ્લા મેજિસ્ટ્રેટ્સને જવાબદારી સોંપાઈ

આ મહત્વની બેઠકમાં વીડિયો કોન્ફરન્સિંગ દ્વારા તમામ જિલ્લા મેજિસ્ટ્રેટ્સ પણ જોડાયા હતા. મુખ્ય સચિવે સ્પષ્ટ કર્યું હતું કે તમામ શાળાઓમાં શૌચાલયની ઉપલબ્ધતા અને તેની સફાઈ વ્યવસ્થાનું સીધું નિરીક્ષણ જિલ્લા વહીવટી તંત્રે કરવાનું રહેશે. શિક્ષણ વિભાગને રાજ્યભરની શાળાઓનો ડેટા એકત્ર કરી જ્યાં સુવિધા ખૂટે છે ત્યાં યુદ્ધના ધોરણે કામ શરૂ કરવા સૂચના અપાઈ છે.

મહિલા સશક્તિકરણ તરફ એક ડગલું

શાળાઓમાં મૂળભૂત સુવિધાઓના અભાવે ઘણીવાર વિદ્યાર્થીનીઓનો ડ્રોપ-આઉટ રેશિયો વધતો હોય છે. ઉત્તરાખંડ સરકારના આ નિર્ણયથી દીકરીઓને સુરક્ષિત અને સ્વચ્છ વાતાવરણ મળશે, જે તેમના શિક્ષણ અને સ્વાસ્થ્ય બંને માટે હકારાત્મક સાબિત થશે. 8 માર્ચની ડેડલાઇન નક્કી કરીને સરકારે આ પ્રોજેક્ટને પ્રાથમિકતાના ધોરણે પૂર્ણ કરવાનો સંકલ્પ કર્યો છે.