નવી દિલ્હી:  ભારતીય રાષ્ટ્રીય કોંગ્રેસ અત્યારે એક અજીબ ધર્મસંકટમાં ફસાયેલી છે. એકતરફ રાહુલ ગાંધી છે, જેઓ દાયકાઓથી પક્ષનો ચહેરો છે, તો બીજી તરફ પ્રિયંકા ગાંધી છે, જેમનામાં કાર્યકરોને 'ઇન્દિરા ગાંધી'ની ઝલક દેખાય છે. તાજેતરમાં મહારાષ્ટ્ર, હરિયાણા અને દિલ્હીમાં કોંગ્રેસના પરાજયે પક્ષમાં દબાયેલા અસંતોષને વાચા આપી છે. સહારનપુરના સાંસદ ઇમરાન મસૂદ અને ઓડિશાના નેતા મોહમ્મદ મોકીમ જેવા દિગ્ગજોએ ખુલ્લેઆમ પ્રિયંકા ગાંધીની નેતૃત્વ ક્ષમતાના વખાણ કરીને રાહુલ ગાંધીના પ્રભુત્વ સામે પરોક્ષ રીતે સવાલો ઉઠાવ્યા છે. હવે સ્થિતિ એવી છે કે કોંગ્રેસ ભલે ઉપરથી એક દેખાય, પણ અંદરખાને "પ્રિયંકા લાવો, કોંગ્રેસ બચાવો"ના નારા વધુ પ્રબળ બની રહ્યા છે.

પ્રિયંકા ગાંધીની સરખામણી રાહુલ સાથે થવાનું મુખ્ય કારણ તેમની સંસદીય સક્રિયતા અને આકર્ષક વક્તૃત્વ શૈલી છે. વાયનાડથી સાંસદ બન્યા બાદ પ્રિયંકાએ સંસદમાં જે રીતે બાંગ્લાદેશમાં હિન્દુઓ પર થતા અત્યાચાર અને આર્થિક મુદ્દાઓ પર સરકારને ઘેરી છે, તેણે વિપક્ષી નેતાઓ જ નહીં પણ સત્તાપક્ષના મંત્રીઓને પણ પ્રભાવિત કર્યા છે. રાહુલ ગાંધીની શૈલી ઘણીવાર આક્રમક અને વિવાદાસ્પદ રહે છે, જ્યારે પ્રિયંકા વધુ સંતુલિત અને જમીની સ્તરે લોકો સાથે ભાવનાત્મક રીતે જોડાવામાં માહિર માનવામાં આવે છે. કેન્દ્રીય મંત્રી કિરેન રિજિજુ જેવા નેતાઓએ પણ નોંધ્યું છે કે પ્રિયંકાની બોલવાની ઢબ વધુ શ્રવણશીલ અને પ્રભાવશાળી છે, જે રાહુલ ગાંધીની 'ગેપ' પુરી શકે તેમ છે.

રાજકીય પંડિતો માને છે કે 2025 ના ચૂંટણી પરિણામોએ ગાંધી પરિવારમાં સત્તાના સંતુલનને હચમચાવી દીધું છે. પ્રિયંકા ગાંધી અત્યાર સુધી પડદા પાછળ રહીને માત્ર પ્રચારની જવાબદારી સંભાળતા હતા, પરંતુ સંસદમાં તેમની એન્ટ્રીએ તેમને રાષ્ટ્રીય ફલક પર મોટા નેતા તરીકે સ્થાપિત કર્યા છે. રોબર્ટ વાડ્રાનું તાજેતરનું નિવેદન કે 'કાર્યકરો પ્રિયંકાને નેતા તરીકે જોવા ઈચ્છે છે' - તે હકીકતમાં રાહુલ ગાંધીના નેતૃત્વ સામે એક ગંભીર પડકાર છે. ભાજપ અને અન્ય વિરોધ પક્ષો પણ આ તકનો લાભ લઈને કોંગ્રેસમાં 'બે પાવર સેન્ટર' હોવાની વાત પર જોર આપી રહ્યા છે. હવે જોવાનું એ રહેશે કે કોંગ્રેસ પ્રિયંકાને માત્ર એક 'સ્ટાર પ્રચારક' તરીકે જ રાખશે કે પછી ખરા અર્થમાં પક્ષની કમાન તેમના હાથમાં સોંપશે.