બેંગલુરુ: નવા વર્ષ ૨૦૨૬ના સ્વાગત માટે જ્યારે આખો દેશ થનગની રહ્યો છે, ત્યારે ઓનલાઈન ડિલિવરી ક્ષેત્રે મોટા સંકટના વાદળો છવાયા છે. ઇન્ડિયન ફેડરેશન ઓફ એપ-આધારિત ટ્રાન્સપોર્ટ વર્કર્સ (IFAT) સહિતના મુખ્ય યુનિયનોએ ૩૧ ડિસેમ્બરના રોજ દેશવ્યાપી હડતાળનું એલાન કર્યું છે. આ હડતાળનો મુખ્ય હેતુ ‘૧૦ મિનિટ ડિલિવરી’ જેવા જોખમી મોડેલ પર પ્રતિબંધ મૂકવાની અને કામદારોની સુરક્ષા તેમજ વાજબી વેતનની માંગણી કરવાનો છે.

૧૦ મિનિટની ડિલિવરી: જીવનું જોખમ

ડિલિવરી એજન્ટોનો આક્ષેપ છે કે ૧૦ મિનિટમાં ડિલિવરી પહોંચાડવાના દબાણને કારણે તેઓએ ટ્રાફિકના નિયમો તોડવા પડે છે અને અકસ્માતનું જોખમ ખેડવું પડે છે. યુનિયનોએ કેન્દ્રીય શ્રમ મંત્રી મનસુખ માંડવિયાને પત્ર લખીને આ અમાનવીય મોડેલને બંધ કરવા વિનંતી કરી છે. એજન્ટોનું કહેવું છે કે રસ્તા પરની અંધાધૂંધી વચ્ચે ૧૦ મિનિટનો ટાર્ગેટ પૂરો ન થાય તો કંપનીઓ દ્વારા તેમને દંડ કરવામાં આવે છે, જે તદ્દન અન્યાયી છે.

‘એપ બંધ’ હડતાળની વ્યાપક અસર

બેંગલુરુમાં જ લગભગ ૩૫,૦૦૦ જેટલા યુનિયન સભ્યો આ હડતાળમાં જોડાય તેવી શક્યતા છે. ડિલિવરી ડ્રાઈવરોનું કહેવું છે કે ઘણીવાર રેસ્ટોરન્ટ કે ગ્રાહકની ભૂલ હોવા છતાં કંપનીઓ એજન્ટોના ID બ્લોક કરી દે છે અથવા તેમના પગારમાંથી કાપ મૂકે છે. નવા વર્ષની પૂર્વ સંધ્યાએ સુરક્ષાના પ્રશ્નોને ટાંકીને કામદારોએ જણાવ્યું કે, અપમાનજનક નોકરી માટે જીવનું જોખમ લેવા કરતાં તેઓ આ દિવસે કામથી દૂર રહેવાનું પસંદ કરશે.

હોટલ અને રેસ્ટોરન્ટ ઉદ્યોગમાં ફફડાટ

૩૧ ડિસેમ્બર એ વર્ષનો એવો દિવસ છે જ્યારે ઓનલાઈન ફૂડ ઓર્ડરનો રાફડો ફાટે છે. જો ડિલિવરી એજન્ટો હડતાળ પર ઉતરે તો રેસ્ટોરન્ટ્સને કરોડો રૂપિયાનું નુકસાન થઈ શકે છે. પિઝા બેકરી જેવા મોટા આઉટલેટ્સના માલિકોનું કહેવું છે કે છેલ્લી ઘડીએ પોતાની ડિલિવરી સિસ્ટમ ઉભી કરવી અશક્ય છે. જો એગ્રીગેટર એપ્સ (Zomato, Swiggy) કામ નહીં કરે તો ગ્રાહકોને સમયસર ભોજન પહોંચાડી શકાશે નહીં.

મુખ્ય માંગણીઓ પર એક નજર:

· ૧૦-મિનિટ ડિલિવરી મોડેલ પર તાત્કાલિક પ્રતિબંધ.

· ડિલિવરી દીઠ લઘુત્તમ બેઝ પે ૨૦ રૂપિયા નક્કી કરવો.

· મનસ્વી રીતે ID બ્લોક કરવાની પ્રથા બંધ કરવી.

· કામદારોને સામાજિક સુરક્ષા અને વીમાનો લાભ આપવો.